Жүдо бөхийн насанд хүрэгчдийн УАШТ энэ сарын 10-12-ны хооронд гурван өдөр үргэлж өнөөдөр холимог багийн тэмцээнээр өндөрлөв.  УАШТ-ий холимог багийн тэмцээний хүрэл медалийг “Алдар” спорт хорооны “Алдар-1” баг, хоёр дахь хүрэл медалийг “Алдар-2” баг хүртлээ. Харин холимог багийн аваргын төлөөх барилдаанд “Женко-1” баг, “Хилчин-1” багтай ширүүн өрсөлдөөн өрнүүллээ. Тус барилдааны эцэст 4:2-ын харьцаагаар “Хилчин-1” баг, холимог багийн УАШТ-ий алтан медалийг хүртэв.

    “Хилчин-1” багийн жүдочид холимог багийн тэмцээнд анх удаа түрүүллээ. Жүдо бөхийн УАШТ-ий холимог багийн тэмцээнд өнөө жил шинэ аварга мэндэллээ. “Хилчин-1” багийн бүрэлдэхүүнд ОУХМ Б.Эрдэнбаяр, Ц.Ган-Эрдэнэ, ОУХМ Б.Гончигсүрэн О.Саруул, А.Дуламсүрэн, ОУХМ О.Оюунчимэг нар барилдав. Багийн шийдвэрлэх ялалтыг ОУХМ О.Оюунчимэг, “Женко-1” багийн ОУХМ Б.Алтанцэцэгийг ялж авчирлаа. Харин мөнгөн медаль хүртсэн “Женко-1” багийн бүрэлдэхүүнд А.Өсөхжаргал, ОУХМ М.Ням-Эрдэнэ, ОУХМ Н.Мөнхбаяр, ОУХМ Д.Номинзул, ОУХМ Д.Пүрэвдорж, ОУХМ Б.Алтанцэцэг нар барилдсан юм.