Нийслэлийн Биеийн тамир, спортын газраас нийслэлийн спортын салбарын 2024 оны шилдгийн шилдгүүдээ тодруулан алдаршуулах ёслолын ажиллагааг 2024 оны арванхоёрдугаар сарын 9-ний өдөр зохион байгууллаа. Нийслэлийн 2024 оны “Шилдэг тамирчин” номинацийн эзнээр ерөнхий боловсролын 42 дугаар сургуулийн 8-ын “Б” ангийн сурагч, Сонгинохайрхан дүүргийн Засаг даргын дэргэдэх даамын өсвөрийн шигшээ багийн тамирчин Баатархүүгийн Тамир шалгарлаа.

     Тэрбээр даамын өсвөр үеийн дэлхийн хошой аварга болж даамын спортын мастер цол хүртсэн.  2024 оны зуун буудалт даамын ДАШТ-ий “Классик” болон “Блиц” ангилалд алтан медальт, Ази тивийн аваргын алт, хүрэл медаль хүртсэн амжилтыг үзүүлсэн юм.

     Харин Нийслэлийн 2024 оны “Шилдэг дасгалжуулагч” номинацийн эзнээр Хан-Уул дүүргийн Засаг даргын дэргэдэх жүдо бөхийн өсвөрийн шигшээ багийн багш, МУГД Шархүүгийн Цэвэлмаа шалгарав. Нийслэлийн 2024 оны “Шилдэг багш” номинацийн эзнээр 69 дүгээр сургуулийн Биеийн тамирын багш Шагдаржавын Дүүриймаа, 291 дүгээр цэцэрлэгийн Биеийн тамирын багш Бямбаагийн Чадраабал нар шалгарлаа.