Дэлхий нийтийг хамарсан цар тахлын улмаас 2020 онд болох байсан Токиогийн олимпийн наадам хойшлогдсон билээ. Харин энэ онд болох Токиогийн олимпийн наадамд тамирчдынхаа бэлтгэл сургуулилтыг хангуулах, цаашлаад олимпийн эрхийн оноо олгох тэмцээнүүдэд алдахгүй оролцуулах зэрэг асуудлууд тулгарч байна. Тэгвэл жүдогийн шигшээ багийн тамирчид Катарын нийслэл Доха хотод болох олимпийн эрхийн оноо олгох тэмцээнд оролцохоор бэлтгэлээ хангаад байгаа аж. 

Тодруулбал, IJF буюу Олон улсын жүдо бөхийн холбооноос энэ оны нээлтээ дэлхийн мастерсаар эхлүүлэх гэж байна. Тус тэмцээн нь нэгдүгээр сарын 11-нээс 13-ны өдрүүдэд Катар улсын нийслэл Доха хотод болох бөгөөд таван тивийн 70 орны 399 шилдэг жүдоч оролцох юм байна. Манай улсын шилдэг 17 жүдоч тус тэмцээнд уригдаж, мэдүүлгээ явуулаад байгаа юм. Тухайлбал, МУГТ М.Уранцэцэг, МУГТ Д.Сумъяа, МУГТ Д.Амартүвшин, ОУХМ Ө.Дүүрэнбаяр тэргүүтэй 17 жүдоч PCR шинжилгээнд хамрагдаж Доха хотыг зориход бэлэн болжээ. 

Тэд одоогоор Улсын онцгой комиссын шийдвэрийг хүлээж байгаа аж. Хэрвээ УОК-оос явах зөвшөөрөл өгвөл энэ сарын 8-нд Хүннү эйр компанийн нислэгээр Доха хотыг зорих юм байна.