Монгол Улсын чөлөөт бөхийн тамирчдаас Ази тивийн аварга болсон 23 дахь бөх бол ОУХМ  Мөнхболдын Дөлгөөн юм. Харин  тэрбээр эмэгтэй чөлөөт бөхчүүдээс Азийн аварга болсон ес дэх тамирчин билээ.

          ОУХМ М.Дөлгөөн “Нанжинь-2014” залуучуудын олимпын наадмын мөнгөн медальтай. Азийн аваргаас гурван жил дараалан медалийнхаа өнгийг хувиргаж (2019 онд хүрэл, 2020 онд мөнгө, 2021 онд алтан медаль хүртсэн.)  Ази тивийн аваргын иж бүрэн медалийн эзэн билээ . Түүнийг чөлөөт бөхөө орхиж, холимог тулааны тамирчин болсон гэдэг мэдээлэл гараад байгаа юм. Энэ талаар өөрөөс нь тодруулга авлаа.

-Өөрийг чинь чөлөөт бөхөөс холимог тулааны спорт руу шилжих боллоо гэсэн мэдээлэл цацагдах боллоо. Энэ хэр бодит мэдээлэл вэ?

            -Яг одоогоор чөлөөт бөхөө орхиод холимог тулаан руу орчихсон зүйл байхгүй. Жаламхар ахын “Шоу”-ны баг хамт олноос холимог тулааны тэмцээнд оролцооч гэсэн санал тавьсан байгаа. Тийм болохоор өөрийн сонирхлын дагуу л оролцож гэж байна.

-Тулааны спортын чухам юу нь сонирхлыг тань татах болов. Багадаа тулааны спортоор хичээллэж байсан уу?

         -Чөлөөт бөхийн спортоо, холимог тулаанаар солиогүй байгаа. Бага байхдаа тулааны спортоор хичээллэж байгаагүй. Холимог тулааны спорт  бокс, бөх, бусад тулааны спортын олон төрлийг нэгтгэсэн, хүнээс тэсвэр, тэвчээр, хатуужил, ур чадвар, хүч техник шаардсан сонирхолтой спорт санагддаг. Миний хувьд энэ бүхнийг хийж, туршиж үзмээр санагдаад сонирхож байна.

-Чөлөөт бөхөөр хичээллээд хүрэхийг хүссэн том оргил нь юу байсан бэ. Тэр оргилд хүрэх зорилгоосоо буцаагүй биз дээ?

         -Өөрийн хүсэл мөрөөдлөөсөө буцаагүй. Чөлөөт бөхөөрөө хичээллэнэ. Ямар ч байсан чөлөөт бөхийн ДАШТ-д оролцож, дэлхийн аваргаас медаль авахыг бодож явдаг. Амжилтад хараахан хүрээгүй байгаа. Хүсэл мөрөөдөлдөө хүрэхийн төлөө хичээж байгаа.