Төр түмний их баяр наадамд түрүүлж, улсын арслан цол хүртсэн М.Бадарчаас допинг илэрсэн нь батлагдлаа гэх мэдээлэл хаа сайгүй хөвөрч эхэллээ. Тухайлбал, Допингийн үндэсний хороо М.Бадарчид шинжилгээний хариуг танилцуулахад “Энэ оны дөрөвдүгээр сард хэрэглэсэн” хэмээсэн тухай мэдээлэл цахим орчинд цацагдаад байна. Хэрвээ энэ үнэн бол 2022-2023 оны Үндэсний Алтан цомын барилдаанд түрүүлсэн Архангай аймгийн бөхчүүд бүгд допинг хэрэглэсэн юм биз. Учир нь, энэ жилийн улсын баяр наадамд дээгүүр барилдах таамагт багтаж байсан улсын харцага Б.Зоригтбаатар, О.Мөнх-Эрдэнэ, аймгийн арслан Э.Мөнхжаргал нар доогуур даваанд учраа бөхдөө унасан. Тэд үнэхээр унасан уу, эсвэл дөрвөөс дээш давсан бөхчүүдээс допингийн шинжилгээ авахыг мэдээд унаж өгсөн үү гэдэг эргэлзээ төрүүлж байгаа юм.

               Тухайлбал, Улсын баяр наадамд дархан аварга Г.Өсөхбаяраар гурав давсан аймгийн арслан Э.Мөнхжаргал улсын баяр наадамд таваас дээш давж улсын цолонд хүрэх магадлал өндөр байсан. Гэвч дөрвийн даваанд юу юугүй л Ө.Бат-Өлзий заанд уначихсан. Үзэгчид “Ө.Бат-Өлзий заантай оноолт таарсан нь тоогүй юм боллоо” хэмээн битүүхэн харамсаад өнгөрсөн билээ. Гэвч Архангай аймгийн Хотонт сумын харьяат Э.Мөнхжаргал давахгүйдээ биш, допингийн шинжилгээ өгөхөөс эмээгээд унасан байх магадлалтай байна. Учир нь, дөрөв давчихвал Бөхийн салбар хорооноос гаргасан дүрэм, журмын дагуу допингийн шинжилгээ өгөх ёстой байдаг. Үүнээс гадна “Алтан цом”-ын барилдаанд маш сайн барилдаж, бөх сонирхогчдоос сайшаал хүртээд байсан О.Мөнх-Эрдэнэ харцага тавын даваанд унасан бол Р.Пүрэвдагва гарди гурвын даваанд учраа бөхдөө өвдөг шороодсон. “Энэ жилийн улсын баяр наадамд түрүүлэх зорилготой” хэмээн “Алтан цом”-ын барилдааны үеэр үзэгчдэд хэлээд амжсан Р.Пүрэвдагва гурвын даваанд унасан нь бас л олны хар дагуулах боллоо. Уг нь “Алтан цом”-ын барилдаанд Архангай аймгийн баг аатай, аархуу ч байсан. Гэвч улсын баяр наадмаар шил шилээ дараад унасан нь энгийн нэг тохиолдол байх боломжтой юу.

        Хамгийн наад зах нь бөх сонирхогчдын дунд “Цахилгаан” Зоригоо хэмээн алдаршсан улсын харцага Б.Зоригтбаатарыг “Цолоо ахиулна, түрүүлэхийг байг гэх газаргүй. Сайн барилдаж байгаа” хэмээн олзуурхан таамаглаж байлаа. Гэвч Б.Зоригтбаатар харцага аймгийн арслан Л.Отгонбаатарт дөрвийн даваанд унаснаар бөхөд хайртай, бөх үздэг олны найдвар талаар болсон. Дээрх жишээнээс харвал “Алтан цом”-ын барилдаанд түрүүлсэн Архангай аймгийн бөхчүүд улсын баяр наадмаар бараг бүгд доогуур даваанд унажээ. Харин ганцхан М.Бадарч учраа бөхөө түргэн шуурхай өвдөг шороодуулсаар түрүүлсэн. Гэвч М.Бадарчаас допинг илэрсэн нь тодорхой болж байх шиг байна. Нэг үгээр бол Архангайн аймгийн бөхчүүд “Алтан цом-ын барилдаанд түрүүлэх гэж допинг хэрэглээд М.Бадарчаас бусад нь улсын баяр наадамд доогуур даваанд зохион байгуулалттайгаар унасан юм биз.