Зүүн Азийн залуучуудын наадмын зочид төлөөлөгчид “Олимпик хаус”-т зочлох үеэр МҮОХ-ны ерөнхийлөгч Б.Баттүшиг Японы ҮОХ-ны ерөнхийлөгч Ясүхиро Ямашитаг хүлээн авч уулзан ажил хэргийн яриа өрнүүллээ. Уулзалтад МҮОХ-ны тэргүүн дэд ерөнхийлөгч Ч.Наранбаатар, дэд ерөнхийлөгч О.Одбаяр, ерөнхий нарийн бичгийн дарга Э.Бадар-Ууган, гүйцэтгэх зөвлөлийн гишүүн Ч.Амарсанаа, Монгол Улсын сайд, Олимп, нийтийн биеийн тамир, спортын Үндэсний хорооны дарга Б.Бат-Эрдэнэ, зөвлөх Э.Тэмүүжин, БТСУХ-ны дарга О.Баттулга нар байлцлаа.

           Уулзалтын үеэр талууд хоёр орны ҮОХ-дын хоорондын харилцааг өргөжүүлэн тэлэх боломжийн талаар санал солилцов. МҮОХ-ны ерөнхийлөгч Б.Баттүшиг ноён Ямашитаг эх орондоо тухлан саатахыг урьж, Зүүн Азийн залуучуудын наадамд өрсөлдөх тамирчдад нь амжилт хүслээ. Ноён Ясүхиро Ямашита жүдогийн тамирчин байсан бөгөөд 1984 оны Лос-Анжелесийн олимпод түрүүлснээс гадна ДАШТ-д дөрвөн удаа аваргалж байв. Улмаар 2019 онд Японы ҮОХ-ны ерөнхийлөгч, 2020 онд ОУОХ-ны гишүүнээр сонгогдсон юм.