Өнгөрсөн долоо хоногт самбо бөхийн оюутны улсын аварга шалгаруулах тэмцээн Сонгинохайрхан дүүргийн спорт цогцолборт болж өнгөрлөө. Тэмцээнийг Монголын самбо бөхийн холбоо, МОСХ хамтран заавар, удирдамж гарган явуулсан юм. Тус оюутны улсын аварга шалгаруулах тэмцээн эмэгтэй, эрэгтэй спорт самбо болон байлдааны самбо бөхийн төрлөөр явагдаж 20 орчим их дээд, сургуулийн 140 орчим тамирчин оролцсон байна. Тэмцээний аварга болсон тамирчдыг ОХУ-ын Екатеринбург хотноо 2023 оны наймдугаар сарын 19-ний өдөр болох ”Олон улсын оюутны спортын фестиваль”-д шалгаруулан оролцох юм байна.