Катар Улсын Доха хотод жүдо бөхийн 2023 оны ДАШТ долоо дахь өдрөө үргэлжлэн явагдана. Дэлхийн аваргын өнөөдрийн урьдчилсан барилдаан 16:30 цагаас эмэгтэйчүүдийн +78 кг, эрэгтэйчүүдийн +100 кг-ын жингийн хэсгийн барилдаанаар эхлэх юм. Харин финалын барилдаан орой 23:00 цагаас эхэлнэ. Маргааш холимог багийн тэмцээн явагдаж ДАШТ-н өндөрлөнө.

         Энэ удаагийн ДАШТ-д дэлхийн 99 орны эрэгтэй 343, эмэгтэй 314, нийт 667 тамирчин хүч сорин өрсөлдөж байна. Өнөөдөр хувийн барилдааны сүүлийн жингийн барилдаанууд явагдана. Эрэгтэйчүүдийн +100 кг-ын жинд 43 бөх, эмэгтэйчүүдийн +78 кг-ын жинд 41 бөх барилдах юм.

           Эрэгтэйчүүдийн хүнд жин +100 кг-ын “В” хэсгийг ОУХМ, Одхүүгийн Цэцэнцэнгэл толгойлон барилдана. Тэрбээр нэгдүгээр тойрогт гоц мөргөн ялалт авсан. Хоёрдугаар тойрогт  АНУ-ын  Christian Konoval, Бахрейны Azamat Chotchaev нарын хэн ялсантай барилдана.

         Харин эмэгтэйчүүдийн хүнд жин +78 кг-ын жингийн “А” хэсгийн нэгдүгээр тойрогт ОУХМ, Амарсайханы Адъяасүрэн гоц мөргөн ялалт авсан байгаа. Тэрбээр хоёрдугаар тойрогт Молдавын Ohana Diacenco-той таарсан. Хэрэв түүнийг ялах юм бол гуравдугаар тойргийн барилдаанд Хятад, Алжир, Хорватын бөхчүүдийн хэн ялсантай барилдана.