“Улаанбаатар-2023” Зүүн Азийн залуучуудын наадмын багийн ахлагч нарын хурал нийслэл хотноо хоёр өдөр үргэлжилж, өчигдөр өндөрлөсөн байна. Хурлын дараа Зүүн Азийн Үндэсний олимпын хороодын төлөөлөгчид “Олимпик хаус”-т зочлон ажил хэргийн яриа өрнүүлж, Олимпын музей үзэж сонирхлоо. Зочдыг МҮОХ-ны ерөнхийлөгч Б.Баттүшиг, тэргүүн дэд ерөнхийлөгч Ч.Наранбаатар нар хүлээн авч уулзан, Зүүн Азийн бүс нутгийн хэмжээнд спорт, олимпизмыг хөгжүүлэх талаар санал солилцов.