“Бостон Селтикс” багийн үндсэн гарааны тоглогч Жейсон Татум гэрээгээ сунган таван жилийн 195 сая ам.долларын гэрээнд гарын үсгээ зурсан талаар ”ESPN”-ий тоймч Адриан Войнаровскид эх сурвалжууд мэдээлсэн гэнэ. Өдгөө мэргэжлийн багт дөрөв дэх жилдээ тоглох гэж буй 22 настай Жейсон Татум хэдий нь бүх одод тоглогчоор шалгарч, маш өндөр мөнгөн дүнтэй том гэрээ байгуулж, сагсан бөмбөг сонирхогчдын хараанд өртөж байна. 2017 оны драфтын хулгай хэмээгдэж байгаа түүний сагсан бөмбөгийн тоглох потенциал, байрлалын шилжилтүүд нь таалагдаж буй талаар “Бостон Селтикс” багийн ерөнхий менежер Дэнни Айнг нэгэн удаа дурдаж байсан. Тийм учраас 22 настай залуу Жейсон Татумыг багтаа голлож, түүний тойруулан туслах үүргийн тоглогчид авчрахаар болсон нь баттай боллоо. Эх сурвалжийн мэдээлснээр гэрээний нийт хугацаа таван жил гэж мэдээлсэн боловч ”ESPN”-ий тоймч Адриан Войнаровски үзэж буйгаар гэрээ дөрвөн жилийнх байж магадгүй хэмээн үзэж байгаа аж.