Монголын үндэсний олимпын хорооны тэргүүн дээд шагнал гардуулах “Бөртэ чоно-2022” ёслол энэ сарын 26-ны өдөр “Чингис хаан” музейд болно. Энэ жил 20 дахь удаагаа зохиогдох “Бөртэ чоно” ёслол уламжлал ёсоор 16 номинацаар шилдгүүдээ тодруулах бөгөөд оны шилдэг тамирчдыг спортын сэтгүүлчдийн саналаар шалгаруулах юм. Өнгөрсөн жил жүдоч М.Уранцэцэг олимпын наадам болон ДАШТ-ээс хүрэл медаль хүртсэн амжилтаараа оны шилдэг тамирчнаар шалгарч, “Бөртэ чоно”-ын эзэн болсон билээ. Харин энэ жил оны шилдэг тамирчнаар хэн тодрохыг харахад цөөн хоног үлдлээ.  Иймд Эргэлт.мн мэдээллийн сайтаас “Бөртэ чоно 2022" наадмын шилдгийн шилдэг тамирчинд нэр дэвших өндөр магадлалтай дараах таван тамирчныг онцлон хүргэж байна.

ЖҮДО БӨХИЙН ОЛИМП, ДЭЛХИЙН ХОС МЕДАЛЬТАН Ц.ЦОГТБААТАР

      Бидний онцлох эхний тамирчин бол Монгол Улсын гавьяат тамирчин, дэлхийн аварга, олимпын хүрэл медаль, Ази тивийн аварга, Үндэсний шигшээ баг, “Сүлд” спорт хорооны тамирчин Цэнд-Очирын Цогтбаатар. Тэрбээр "Токио-2020” олимпын наадмаас хүрэл медаль, насанд хүрэгчдийн жүдо бөхийн 2022 оны 73 клограммын жингийн дэлхийн аварга болсон амжилтаараа “Бөртэ чоно-2022” наадмын оны шилдгийн шилдэг тамирчинд нэр дэвших магадлалтай тамирчин юм.

ЧӨЛӨӨТ БӨХИЙН ДЭЛХИЙН ХОС МЕДАЛЬТАН М.ЛХАГВАГЭРЭЛ

     Түүний дараагаар “Бөртэ чоно-2022” наадамд нэр дэвших магадлалтай тамирчны нэг бол  Монгол Улсын гавьяат тамирчин, Үндэсний шигшээ баг, “Хилчин” спорт хорооны тамирчин Мөнхтөрийн Лхагвагэрэл. Тэрбээр “Белград-2022” чөлөөт бөхийн ДАШТ-ий эрэгтэйчүүдийн 125 кг-ын жинд мөнгөн медаль, "Токио 2020" олимпын тавдугаар байр, "Осло-2021" ДАШТ-ий хүрэл медаль хүртсэн амжилттай нэгэн юм.

ЧӨЛӨӨТ БӨХИЙН ДЭЛХИЙН АВАРГЫН ХОС МЕДАЛЬТАН Д.ОТГОНЖАРГАЛ

    Монгол Улсын гавьяат тамирчин, Үндэсний шигшээ баг, “Женко” клубийн тамирчин Долгоржавын Отгонжаргалын хувьд ч мөн “Бөртэ чоно-2022” наадамд нэр дэвших боломжтой тамирчин. Тэрбээр Белград-2022 чөлөөт бөхийн насанд хүрэгчдийн ДАШТ-ий 48 кг-ын жинд мөнгө, Осло 2021 ДАШТ-ий хүрэл, дэлхийн цомын хүрэл медаль хүртсэн амжилтыг үзүүлж байсан билээ.

ХҮНДИЙН ӨРГӨЛТИЙН ДЭЛХИЙН АВАРГА, АЗИ ТИВИЙН ХОШОЙ АВАРГА М.АНХЦЭЦЭГ

    Монгол Улсын гавьяат тамирчин, дэлхийн аварга, Үндэсний шигшээ баг, ”Алдар” спорт хорооны тамирчин Мөнхжанцангийн Анхцэцэг мөн “Бөртэ чоно-2022” наадамд нэр дэвших магадлалтай тамирчин билээ. Тэрбээр Бахрейн Улсын Манама хотноо болсон хүндийг өргөлтийн Ази тивийн аварга шалгаруулах тэмцээнд -87 кг жинд хүчээ сорин гурван алтан медалийн эзэн болж, Ази тивийн хошой аварга болсон юм. Мөн  Монголын хүндийн өргөлтийн төдийгүй спортын түүхэнд "Алтан үсгээр" бичигдсэн олон амжилтын эзэн, дэлхийн аварга, ДАШТ-ий хошой мөнгө, хошой хүрэл медальт, "Токио 2020" олимпын наадмын дөрөвдүгээр байрын шагналт, оюутны болон залуучуудын дэлхийн аварга, Ази тивийн аварга, Азийн танхимын наадмын аварга "Алтан охин" хэмээн ард түмэндээ нэрлэгддэг билээ.

-БУУДЛАГЫН ДЭЛХИЙН АВАРГЫН МӨНГӨН МЕДАЛЬТАН Ц.МӨНХЗУЛ-

     Харин буудлагын төрлөөс Монгол Улсын гавьяат тамирчин, Үндэсний шигшээ баг, “Хүч” спорт хорооны тамирчин Цогбадрахын Мөнхзулыг нэрлэж байна. Тэрбээр Египет Улсын Каир хотод болсон буудлага спортын 2022 оны насанд хүрэгчдийн 53 дахь удаагийн дэлхийн аварга шалгаруулах тэмцээний холимог багийн төрөлд мөнгөн медаль, стандарт гар бууны 25 метрийн дасгалд алт медаль хүртсэн амжилттай юм.