Энтони Дэвис “Лос-Анжелес Лейкерс” багт тоглох гэрээнийхээ сүүлийн жилийн 28.7 сая ам.долларын цалингаас татгалзаж, чөлөөт агент болсон тухай нь “ТНТ” телевизийн тоймч Крис Хейнс цахим хуудсаараа зарлалаа. “Лос-Анжелес Лейкерс” баг жилийн өмнө шилдэг залуус Брэндон Инграм, Лонзо Болл, Жош Харт болон драфтын эрхийн хамт түүнийг багтаа авчрахын тулд “Шинэ Орлеан Пеликанс” багтай солилцоо хийсэн билээ.

Тэрбээр “Лейкерс” багт ирснээр лигийн шилдгүүдийн нэг Леброн Жеймстэй хамтран аваргын цом өргөсөн. Довтолгооны потенциалаараа үнэлэгдсэн түүний хамгаалалтын чадвар нь сүүлийн жилүүдэд илт сайжирснаар олон төрлийн тоглолтын системд шилжин тоглох боломжтой. Өдгөө 27 настай супер од Энтони Дэвистэй “Лос-Анжелес Лейкерс” баг 4-5 жилийн өндөр дүнтэй цалингийн гэрээ хийхээр төлөвлөсөн бол лигийн бусад баг ч түүнд “Лейкерс” багийн адил татгалзах аргагүй гэрээг санал болгоод байгаа юм.