“Токио-2020” зуны XXXII наадамд Монгол Улсыг төлөөлж, оролцсон баг, тамирчдын хоёр дахь ээлж эх орондоо ирлээ. Япон Улсын нийслэл Токио хотод зохион байгуулсан ээлжит зуны олимпын наадмын марафон гүйлтийн төрөлд оролцсон Б.Мөнхзаяа сэтгэгдлээ хуваалцсан юм.

Тэрбээр “Энэ удаагийн олимпын наадамд өөрийн хувийн амжилтаа эвдэхийг хичээсэн. 20 дугаар байраар барианд орохыг зорьсон ч чадалгүй 45 дугаар байрт орсон. Дэмжиж байсан бүх хүмүүстээ маш их баярлалаа.

          Цаашдын оролцох тэмцээн, уралдаандаа заавал амжилт үзүүлнэ. Марафон гүйлтийн тэмцээн болсон хотод 30 хэмээс дээш халж, салхи ихтэй байсан. Мөн хөл маань гэмтэлтэй, гүйхэд зовуурьтай байсан. Харин нөхөр маань намайг дасгалжуулдаг учраас сэтгэл зүйн асуудал гараагүй. Цаашид дэлхийн аварга, Парисын олимпын эрхээ авч, амжилттай оролцох болно” гэв.