Арабын Нэгдсэн Эмират Улсын нийслэл Дубай хотод зохион байгуулсан “PUBG mobile” видео тоглоомын дэлхийн аварга шалгаруулах тэмцээнд манай орны “ZEUS” баг амжилттай оролцож, гуравдугаар байрт шалгарч, 100 мянган ам.долларын шагнал хүртжээ. Дэлхийн өнцөг булан бүрээс цугласан шилдэг 16 баг гурван өдрийн турш тойргоор тоглосон бөгөөд “ZEUS” багийн тоглогч Zyoll, Godless нар дэлхийн аваргын шилдэг 10 тоглогчийн жагсаалтад багтсан байна.

       Ухаалаг гар утасны “PUBG mobile” видео тоглоомын дэлхийн аварга шалгаруулах тэмцээнийг БНХАУ-ын “1+” гар утасны үйлдвэр ивээн тэтгэж, тэмцээнд оролцож буй тоглогчид тус үйлдвэрийн хамгийн сүүлийн загвар “1+8T” гар утсаар тоглосон аж. Тэмцээний шагналын сан хоёр сая ам.доллар бөгөөд тус тэмцээнд түрүүлсэн Хятадын “NV-QXF” баг 700 мянган ам.долларын шагнал хүртсэн юм. Уг шагналын хэмжээ нь гар утасны видео тоглоомын төрөлдөө ч бус дэлхийн eSport-ын төрөлд хамгийн их шагналын сантайд тооцогдож байна.