Хоёр хоногийн дараа тэр үзэгч, сонсогчдодоо гурав дахь тоглолтоо хүргэх нь. Угтаа даруухан ч хэмнэл хэллэг нь шулуухан. Энэ бол реппер Desant, жинхэнэ нэр нь Г.Батболд. Өөрийн болоод өрөөлийн талаар яриа байвал, өнөөдөр нийгэмдээ үзэл бодлоо дэлгэмээр болвол тэр дуундаа л оруулна, сэтгэлээ давхар уудална. Түүний хэл бол дуу хөгжим, бусдаар тэр даруу оршино.

Ойр дотно нөхөрлөж, хамтран уран бүтээл хийдэг уран бүтээлчдийн зүгээс нэг л зангаараа байж, хэнтэй ч ижилхэн харилцдаг зан чанартай гэж ярьсан нь цөөнгүй юм.

      Хип хоп түүнд өөрийнхөөрөө эрх чөлөөтэй байх орон зайг олгодог гэсэн. Сонсогчдодоо ч мөн тийм эрх чөлөөг мэдрүүлэхийг, дураар, зоргоор оршихуйг хуваалцдаг. Desant долдугаар ангиасаа барууны хип хопчдыг түлхүү сонсож, тэдний дуу хөгжим, хэнд, юунд ч баригдахгүй чөлөөт байдалд хөглөгдөж, хөтлөгдөж иржээ. Ингээд 17 настайдаа дөрвөн найзтайгаа хамтран “Gangsta Service” хамтлаг байгуулж, дараа нь “Click, click boom” бүлгийн гишүүн болж, хип хоп сонирхогч залууст зориулсан “Backyard”шоуг зохион байгуулсан байдаг. Харин 2017 онд “Тоонот”-ыг хамтран байгуулснаар өдгөө хүртэл дуу хөгжмөө хийсээр яваа. Түүнийг бид “15”, “4.12”, “Захидал”, “Midnight”, “Ballergang”, “Broda”, “Big fish” зэрэг олон дугаар нь мэдэх бөгөөд өөрөө үгээ бичиж, аяа хийдгээрээ онцлог. Нэг ёсондоо цэвэр өөрийн үзэл бодол, ертөнцийг бусдад дамжуулж, түүгээр нь бид түүнийг мэдэж, мэдэрч, илүү ойр сонсдог байх.

   
  Тэр өөрийн ажилладаг арга барилынхаа тухай “Нэг зүйлд бүрэн төвлөрч байж дараагийн ажилдаа шилждэг. Жишээ нь нэгээс хоёр сар студид дуугаа бичүүлэхэд төвлөрч, олон дуу бичүүлээд, дараа нь тэдгээрийнхээ клип рүү орох гэх мэтээр шат дараатай ажилладаг гэсэн үг. Олон юм зэрэг хийх нь надад таардаггүй. Продюсерын ажлаа бол байнга л хийнэ” гэж ярьсан байдаг. Түүх намтар товчхондоо тун энгийн, өөрийгөө ярихаас илүү дуундаа багтаадаг, өөр яриагүй, өрсөлдөж бариагүй, урдахаа л чанартай хийхийг зорьдог ийм нэг реппер өдгөө ч хөл тавьсан урсгалдаа түүчээ явна. Цаг хугацаа ахихын хэрээр уран бүтээлчид урсгалаа өөрчилдөг бол тэр гангстадаа үнэнч, бүр илүү ч шинэлэг болохыг хичээж буй аж. Цааш түүний дуу хөгжимд илүүтэй саатаж, үгийг нь чих тавин сонсоцгооё. Тэнд л тэр бий. 

         Тэрбээр энэ удаагийн тоглолтоо таван жилийн өмнөөс төлөвлөсөн бөгөөд анх удаа задгай талбайд буюу Төв цэнгэлдэх хүрээлэнд болж байгаагаараа онцлог байна. Мөн 100 хувь хип хоп тоглолт болох бөгөөд 30 метрийн өндөр тайз засаж,хөгжим, гэрэлтүүлгийн хувьд өндөр түвшний бэлтгэж байгаа аж. Мөн тоглолтын үеэр "Hood" дууг бүрэн бүрэлдэхүүнээрээ дуулах байна. Тоглолтын ерөнхий найруулагчаар SKIN entertainment-ийн найруулагч Б.Анар, ерөнхий продюсерээр Халзаа буюу М.Даваасүрэн, тайзны найруулагч Baja буюу Б.Батцэрэн нар ажиллаж байна.

Тоглолтод DJ Zaya, артист Babar, 290, Ratabuzz, Bilgang, Jason зэрэг уран бүтээлчид оролцох юм.