Бид энэ удаагийн “Загварын ертөнц” буландаа “Гоёл 2024” наадмын топ модель, “MISS MONGOLIA-2017” тэмцээний тэргүүн мисс Амарсанаагийн Сайхантамирыг урьж, цөөн хором ярилцлаа.

   Тэрбээр Хэнтий аймгийн Дадал суманд гурван ах, гурван эгч, нэг дүүтэй өнөр бүлд өсөж торнижээ. Мөн А.Сайхантамир 2016 онд Шинжлэх Ухаан Технологийн Их Сургуулийг эрчим  хүчний инженер мэргэжлээр төгсөж байсан. Өдгөө загварын салбарт ажиллахаас гадна Монголын иргэний агаарын тээвэр/ МИАТ/ ТӨХК-д онгоцны үйлчлэгчээр ажилладаг билээ.  

-“Гоёл 2024” наадмын топ модель болсон танд баяр хүргэе. Баярын сэтгэгдлээсээ хуваалцаач?

            -Сайн байна уу. Монголын дизайнеруудын холбооноос жил бүр уламжлал болгон зохион байгуулагддаг, загварын хамгийн дээд наадам болох “Гоёл 2024” наадмын топ модель болсондоо маш их баяртай байна. 13 дахь жилдээ тус наадамд оролцлоо. Өмнө нь “Гоёл 2016” дэд байр, “Гоёл 2020” шилдэг загвар өмсөгчөөр шалгарч байсан удаатай.

            “Гоёл” наадам маань тухайн жилийн загварын өнгө төрх,  шинэ коллецүүдийг нийтэд түгээх зорилготой байдаг. Тиймээс зөвхөн загвар өмсөгчид гэлтгүй бүхий л хүнд хүртээмжтэй болдогт нь баяртай байгаа.

-Загварын тайзан дээр алхах мөчид юу хамгийн их бодогддог вэ?

            -Тайзан дээр алхах бүрдээ “Тухайн хувцсыг хэрхэн гоё харагдуулж, “амилуулах” вэ” гэх бодол л толгойд эргэлддэг. Мөн хүн болгоны нүд тэр хувцсан дээр төвлөрч байгаа учир аль болох сандралгүй харуулахыг хичээнэ. Харин миссийн тэмцээнд орж байх үедээ өөрийгөө хэрхэн зөв илэрхийлэх тал дээр анхаардаг.

-Таны загварын гараа хэзээ, аль тайзнаас эхэлж байсан бэ?

          -Анх 15 насандаа ОХУ-ын Буриад Улсын  “Алтаргана” наадмын тэргүүн миссээр шалгарч байсан. Би дуулах дуртай хүүхэд байлаа. Мөн ёочин хөгжмөөр  14 жил хичээллэсэн. Энэ маань миссийн тэмцээнд оролцоход давуу тал болж өгдөг байх.

-Олон улсын тэмцээнд оролцоход хүндрэл гарч байв уу?      

              -Би цөөнгүй олон улсын тэмцээнд оролцож, чамлахааргүй амжилтуудыг үзүүлж байсан.

• 2014 онд “Манжуурын мисс” тэмцээний гуравдугаар байр, “Шилдэг үндэсний хувцас” номинаци,
• 2016 онд “Дэлхийн авьяаслаг мисс” тэмцээний тэргүүн байр,
• 2022 онд “International fashion week” тэмцээнд багаараа тэргүүн байр тус тус эзэлсэн.

              Сүүлийн жилүүдэд манай улсын миссүүд амжилттай оролцдог болсонд маш их баяртай байгаа. Миний хувьд ажлын онцлогоосоо болоод тэмцээнд тэр бүр оролцоод байх боломжгүй байдаг.

-Эмэгтэйчүүд бид бусадтай өөрийгөө харьцуулах үе их байдаг шүү дээ. Таны хувьд энэ талаар ямар бодолтой байдаг вэ?

            -Би эмэгтэй хүн бүр цор ганц учир өөрийгөө бусадтай харьцуулах нь буруу зүйл гэж боддог.  Харин онцлог, давуу талыг тодотгож, жаргалтай амьдрах хэрэгтэй шүү дээ.

-Та онгоцны үйлчлэгчээр хэд дэх жилдээ ажиллаж байгаа вэ. Яагаад энэ мэргэжлийг сонгох болов?

            -Би зургаа дахь жилдээ онгоцны үйлчлэгчээр ажиллаж байна. Ихэнх эмэгтэйчүүдийн багын мөрөөдөл мисс, онгоцны үйлчлэгч болох байдаг байх. Би ч тэдний адил хүүхэд байхаасаа мөрөөдөж, тууштай хөдөлмөрлөсөөр энд ирсэн байна.

-Ярилцлагын төгсгөлд загвар сонирхож буй өсвөр насны охидод зөвлөгөө өгөөч?

            -Бүх боломж таны өмнө нээлттэй байдаг. Хамгийн гол нь зөв хаалгаа нээж, тууштай, шантрах үедээ босоод инээх тэнхэлтэй байгаарай.