Эрх мэдэл, албан тушаалын төлөө юугаа ч өгөхөөс буцахгүй, мөнгөөр бусдын амь, амьдралыг дураар шийддэг, удирддаг  "Гарц" киноны “DH” группын ерөнхийлөгч Буянтогтохын дүрийг тэр чадварлаг бүтээжээ. Хүнлэг сэтгэл, хүн чанар нь хэдийнэ өөрөөс нь холдон арилж, одоо байгаагаасаа илүү сандал суудалд сууж, бүр төрд шургалахаар, гишүүнд бөхөлзөж гишүүн болохоор хэлсэн бүхнийг нь үг дуугүй дагах нэгнийг өөртөө бүрэн суулгаж, дүрдээ эзэн болж, өнөөдөр төрд орж мөнгө идэхээр байдгаа барж, үхэн хатан зүтгэж буй Буянтогтохуудыг жигштэл ил үзүүлж, илрүүлэн бүтээсэн нь яах аргагүй үзэгчдэд сонин байв.

        Түүний мөнгөөр бүхнийг шийдэж буй жишээнээс дурдахад, газар хууль бусаар авах даалгаврыг хүүдээ өгч, түүнээс үүдэн хүн хөнөөсөн, гэр бүлийнхэнд нь мөн л мөнгө өгч дуугүй болгох гэж үзсэн, хүү нь хэрэгтэй болохын даваанд олон жил хамаг бүхнээ даалган хийлгэж байсан найз Тулгыг нь мөн л дүүг нь гадаадын сайн сургуульд явуулж өгнө, тэтгэж, дэмжинэ гэсэн амлалттайгаар шоронд оруулсан, эцэст нь тэнд нь амийг нь хорлосон. Үүгээр ч зогсохгүй цагдаагийн дарга, хэрэг мөрдөж буй мөрдөгчид авлига өгөх гэж оролдсон гээд мөнгө л байхад бүхний учрыг олно гэж эндүүрэх том дарга. Гэхдээ тун хянамгай, хашир, эрсдлийг тооцогч баян.

       Жүжигчин, найруулагч Б.Гарамхандыг бид "Солонгон зүгт", "Бүхнээс дээгүүр",  "Зориг", "Итгэл", "Алдагдсан өдрүүд", "16 дахь хавар" тэргүүтэй олон арван бүтээл найруулснаар нь мэдэх билээ. Эдгээрээс "16 дахь хавар", "Тэнгэр, газрын заагт бүтээлүүдийнхээ кино зохиол дээр ажиллажээ. Мөн тэрбээр "Маргааш бид буцна", "Хязгааргүй", "Муу нүүрт", "Хохирогч", "Гэрч", "Би ээж болмоор байна", "95%", "Zura II”, зэрэг кинонд часхийсэн дүрүүдийг бүтээснийг үзээгүй хүн ховор байх.

Дүрийн тухайд хэрхэн ажиллаж, өөртөө суулгаж, ямархнаар урладгийг эхлэлд өдгөө яг шуугиулаад буй "Гарц"-ын дүрээр нь жишээ татан бичсэн учир энд дахин давтах нь илүү байх. Зөөлөн дөлгөөн, зэвүүн дориуныг ч хослуулан бүтээж.