Арванхоёрдугаар сарын 1 буюу ДОХ-ын эсрэг олон улсын өдрөөр үзэхэд илүүдэхгүй найман киног нэрлэж байна. Жагсаалтад орсон кинонууд уг өвчний талаарх мэдээлэлд тань нэмэр болохоос гадна уг өвчний аймшигт хор хөнөөлийг ойлгоход тусална.

Филаделфиа (1993)

Жүжигчин Том Хенкс, Антонио Бандерес нар уг кинонд дүр бүтээсэн билээ. ХДХВ-ийн халдвар туссан залууд орчин, нийгэм, хүмүүс хэрхэн хандаж буйг сэтгэл өвтгөм дүрслэн харуулснаараа олны сайшаалыг хүртдэг бүтээл юм.

Минутад 120 зүрхний цохилт (2017)

Франц Улсад 1990-ээд оны эхэн үед өрнөсөн “Акт Ап” хэмээн хөдөлгөөний тухай өгүүлнэ. ХДХВ, ДОХ-ын халдвар авсан залуучууд амьдрахын тулд тэмцэх агаад тэдний “Энэ өвчин надаар дуусаасай” хэмээх чин сэтгэлийн шаналлыг энэ киноноос мэдэрнэ.

Уг кино 2017 оны Каннын кино наадмаас дөрвөн шагнал хүртсэн бүтээл ба бусад кино наадамд ч амжилттай оролцжээ.

Bohemian Rhapsody (2018)

Алдарт “Queen”  хамтлагийн дуучин Фредди Меркүригийн амьдралын тухай хүүрнэх уг киног танд санал болгож байна. Түүний тайзны ардах амьдрал, зовлон, шаналал, ДОХ өвчнөөр хэрхэн шаналж буйг уг киноноос үзэх, мэдрэх боломжтой.

Даллас худалдан авагчдын бүлгэм

Цахилгаанчин мэргэжилтэй хар тамхичин залуугийн бодит амьдралаас сэдэвлэн бүтээсэн кино.  Роб ДОХ хэмээн аюулт өвчин тусаж, ганцхан сар амьдрах хугацаа үлдсэнээ мэднэ. Энэ мэдээ түүний амьдралыг хэрхэн өөрчлөхийг үзээрэй.

Тахлын үед хэрхэн амьд үлдэх вэ-How to survive a Plague (2012)

Уг бүтээл гарсан жилдээ Оскарын баримтат кино төрөлд нэр дэвшжээ. ДОХ эхэн үедээ хэрхэн тархсан тухай болон өвчний суурь маш олон учир шалтгааныг тодруулсан бүтээл билээ.

Нийтийн заналхийлэл- Common Threads (1989)

ДОХ-ын аюул заналын тухай 1980-аад онд хийгдсэн хамгийн нөлөө бүхий баримтат кино гэгддэг. Энэхүү кинонд халдвар авсан хүмүүс төдийгүй, тэдний эцэг, эх, хайртай хүмүүсийн тухай өгүүлэн хүний сэтгэлийн нандин утсыг хөнддөг билээ.  

Америк дахь сахиусан тэнгэр- Angels in America (2003)

Пулицерийн шагналт Тони Кушнерын зохиолоос сэдэвлэн бүтээсэн ба Эммигийн шагналт  HBO-ийн мини цуврал юм. Энэхүү цувралд түүхэн дүрүүд болон Библийн Алегрог багтаасан нь үзэгчдийг өрөвдөм, хайрлам, уур хүргэм, үзэн ядам гээд хүний бүхий л хариу үйлдлийг энэ киног үзэхдээ гаргаж мэднэ гэжээ. Эмгэнэл, гарз хохирол болон Засгийн газар, хүмүүнлэгийн ажил, тэдний хэрцгий алдаа дутагдлыг энэхүү бүтээлээр харуулахыг зорьжээ.

Лазарус нөлөө- The Lazarus Effect (2010)

Энэхүү баримтат кинонд нэмэлт хачиргүй Африкийн үнэн байдлыг дүрсэлсэн байдаг.  Замби Улс дахь ХДХВ-ийн халдвар авсан хүмүүст үнэгүй тараасан ДОХ-ын эсрэг эм хүмүүст хэрхэн нөлөөлж буй тухай өгүүлнэ.