Сэтгэл доторхоо үл чагнаж, өөртэйгөө тэмцэлдэнэ. Энэ тэмцэл цаашлаад сэтгэл зүйн өвчин болох талаар “Винландын домог” өгүүлдэг. Эхнэр, хоёр хүүхдийн хамт нам гүм аж төрөх Тоорсын амьдрал нэгэн өдөр орвонгоороо эргэх нь тэр.

Исландын хойд нутгийн цас мөсний оронд учир битүүлэг хөлөг онгоц газардсан нь түүний араас 10 гаруй жилийн нэхсэн цэргүүд байв. Олон жилийн өмнөх Дани, Норвеги болон Английн хоорондох дайны үеэр тулааны талбарыг хааны зөвшөөрөлгүй орхисон жанжинд үхлийн ял оноохоор ирж. Гэвч нэхэж ирсэн цэргүүд Тоорстой үл тулалдах бөгөөд түүнд “Заавал очих” нэгэн газрыг зааж өгнө. Араас нь нэхэж ирсэн цэргүүд ийнхүү түүнийг орхисон нь түүнтэй тулалдаад ялагдаж болзошгүй гэсэн айдсынх байлаа. Тоорс заасан газарт очиход далайн дээрэмчид тулсан юм. Тулалдааныхаа эцэст олзлогдсон хүүгээ тавьж, явуулахыг хүсэн өөрийн амийг далайн дээрэмчдэд өгнө. Тэрбээр “Жинхэнэ дайчинд илд хэрэггүй” хэмээж, зогссон хэвээр амь насаа алдана. Дараа нь очих газаргүй болсон, мөн эцгийнхээ өшөөг авахыг хүссэн Тоорсын хүү Торфинн далайн дээрэмчдийн хөлгөөр хамт аялна. Энэ хугацаанд Торфинн эцгийг нь хөнөөсөн далайн дээрэмчдийн ахмад Аскеладдыг халз тулаанаар ялахыг хүссэндээ түүнийг даган дээрэмчний, алуурчны амьдралыг сонгох юм.

Эцгийн хамт гэрээ орхисноос хойш Исландын арлууд дайны талбар болж, эхийгээ алдаж, эгчийгээ боол болсныг Торфинн хэзээ ч мэдэхгүй нь гунигтай. Исландыг орхисноос хойш Англи, Дани, Норвеги зэрэг Европын орнуудаар дайн тулаан хийж, хөлсний цэргээр ажиллах Торфиннд зөвхөн тулааны туршлага, ур чадвар өгснөөр Аскеладдыг хөнөөж, эцгийнхээ өшөөг авах зорилго нь нэгэн өдөр үгүй болох нь тэр. Английн эзлэн түрэмгийллийг зогсоох уг дайны дунд буюу 1013 онд Данийн дарангуйлагч хаан Свейнийг хаан ширээнээс буулгаж, түүний бага хүү Күнүтэг хаанд өргөмжлөхийн тулд Аскеладд өөрийн амийг золин, Свейн хааныг хөнөөж, улмаар Күнүтэ ханхүүгийн гарт амиа алддаг. Эцгийгээ нас барснаас хойш өшөө авахыг амьдралын туйлын зорилгоо болгосон Торфинны амьдрал нүднийх нь өмнө үгүй болно. Хамгийн дотнын хүнээ алдав уу гэмээр Торфинн уйтгар шаналан руу унах аж.

Түүний багад эцгийнх нь худалч найзын ярьж өгдөг байсан “Винланд” арлын тухай дүр зураг толгойд нь бууж, эцэг, эх, эгчтэйгээ эрх чөлөөтэй нь аргагүй гүйж буйгаар Торфинн төсөөлнө. Эцгийнх нь мөн өнөө худалч өвгөний дурдах дуртай “Винланд” нь магад дотоод сэтгэлийн эрх чөлөө ч байж болох. Уг арлыг хэн ч мэддэггүй, газрын зураг дээр хаана ч тэмдэглээгүй юм. Аскеладдын үхлээс хойш зорилгогүй, амьдралгүй болсон Торфинн өөрийн дотоод “Винланд”-ыг олсон нь өөрийн хүслээр боол болох байлаа. Японы зохиолч, уран бүтээлч Юкимүра Макотогийн энэхүү шилдэг бүтээл хэдий нь 2005 онд уншигчдад хүртээл болоод зогсохгүй өнгөрсөн жил “Вит” студиэс 24 ангитай цуврал болгож, 2019 оны шилдэг бүтээлүүдийн нэг болсон билээ.