Кино урлагийн зах зээл асар хурдацтай өсөн дэвжиж байгаа билээ. Кино урлагийн салбарт бүтээл хийхийн тулд эхлээд кино зохиолын санаа, сэдвээ олж, улмаар түүнийгээ дэлгэцэд "амьдруулах" хэрэгтэй болдог. Үүний зэрэгцээ кино зохиол гэлтгүй эх зохиолыг ашиглаж, түүнээс сэдэвлэн кино бүтээх нь бий. “Эргэлт.мн” сайт энэ онд нээлтээ хийхээр зарлаад буй эх зохиолоос сэдэвлэсэн таван киног танилцуулж байна.

1.Эмх замбараагүй байдал - Chaos Walking

Америкийн зохиолч, сэтгүүлч Патрик Нессийн 2008 онд хэвлүүлсэн “Chaos Walking” гэж цуврал зохиол бий. Энэ зохиолын эхний боть болох “The Knife of Never Letting Go” бүтээлээс сэдэвлэсэн уг киноны нээлтийг ирэх оны нэгдүгээр сарын 22-нд хийхээр зарласан билээ. Жүжигчин Том Холланд, Дэйзи Ридли нар гол дүрд нь тоглох бөгөөд “Lionsgate” корпорац дэлгэцийн бүтээл болгох юм.

2.Үд дундын од - Stars at the Noon

Латин Америкт суурьших америк гаралтай нэгэн эмэгтэйн хайр сэтгэл, хүсэл мөрөөдөл, өөрөөсөө урвасан түүхийг өгүүлэх “Stars at the Noon” номыг Германы зохиолч, яруу найрагч Денис Жонсон 1986 онд хэвлүүлэн гаргажээ. Уг эх зохиолоос сэдэвлэж, нэрээр нь нэрлэсэн тус киноны гол дүрд Маргарет Куали, Роберт Паттинсон нар тоглох юм. Одоогоор нээлтээ хийх хугацааг албан ёсоор зарлаагүй ч энэ онд нээлтээ хийнэ гэдгээ холбогдох байгууллагаас мэдээлээд байна.

3.Хайртаас чинь ирсэн сүүлчийн захидал - Last Letter from Your Lover

Хэдийнээ уншигчдын танил болоод буй Жожо Моейсын зохиолоор бүтээсэн киноны нээлтийг ирэх жил хийх талаараа “Netflix”-ээс мэдэгдээд буй. 1960 онд Лондон хотод байрлах гэртээ олон жилийн дараа очсон нэгэн сэтгүүлч бүсгүй тоосонд дарагдсан хуучин захиануудыг олсноор уг зохиол эхэлдэг. Тэр олон захиаг уншсан бүсгүйн хайр дурлалын тухай өгүүлэх киноны гол дүрд жүжигчин Фелисит Жонес тоглохоор болсон юм.

4.Цонхон доторх эмэгтэй - Woman in the Window

Америкийн детектив зохиолч А.Ж.Финны “Woman in the Window” хэмээх сэтгэл зүйн триллер зохиолоос сэдэвлэсэн уг киног “20 дугаар зуун” студиэс дэлгэцийн бүтээл болгох юм. 2019 оны аравдугаар сараас эхлэн зураг авалтын ажлаа эхэлсэн ч коронавирусийн хөл хорионы улмаас хойшилсоор ирэх онд нээлтээ хийхээр болсон билээ. Киноны гол дүрд “Golden Globe” шагналын хоёр удаагийн эзэн, жүжигчин Эми Адамс тоглосон юм.

5.Бугын эвэр - Antlers

Америкийн зохиолч, продюсер Ник Антоскагийн “The Quiet Boy” зохиолоос сэдэвлэсэн “Antlers” аймшгийн кино энэ оны хоёрдугаар сард нээлтээ хийнэ. Гэртээ ер бусын амьд биет нуусан байж болзошгүй хүүгийн талаарх мэдээллийг ангийн багшаас нь цагдаа нар тодруулахаар очсоноор зохиол эхэлдэг. Жүжигчин Кери Рассел, Жесси Племонс нар гол дүрүүдийг бүтээсэн уг кино хэдий нь зураг авалтаа дуусгасан бөгөөд нээлтээ хийх хугацаагаа хүлээж байгаа гэнэ.