БОАЖ-ын сайд Д.Сарангэрэлийн хүү Х.Улам-Өрнөхөд АТГ-аас эрүүгийн хэрэг үүсгэн шалгаж эхэлсэн гэдгийг албаны эх сурвалж мэдээллээ. Өдгөө Төрийн өмчийн Бодлого, зохицуулалтын газрын Худалдан авах ажиллагааны газрын даргын албан тушаал хашдаг Х.Улам-Өрнөх сүүлийн үед байсхийгээд л олны хэл аманд өртөж, түүнтэй холбоотой авлига, албан тушаал, тендертэй холбоотой гэгдэх асуудлууд хөврөх болсон. Тэрбээр энэ удаад ч мөн албан тушаалаа урвуулан ашигласан хууль бус үйлдэлтэй холбоотойгоор хуулийн байгууллагын хаалга татаад байгаа бололтой. 

Тэрбээр өмнө нь ээж Д.Сарангэрэлийнхээ жолоочоор ажиллуулж байгаад ЭМЯ-ны Бодлого төлөвлөлтийн газрын Хөрөнгө оруулалтын хэлтсийн даргын албан үүргийг түр орлон гүйцэтгэгчээр томилуулсан найз Д.Өнөболдтойгоо хамтран тендер нэрээр төрийн мөнгө иддэг байх магадлалтай гэх үндэслэлээр АТГ-т шалгагдаж байсан билээ. Мөн тэрбээр “Хоёр тендер авч өгнө” гэж нэгэн барилгын компанийн удирдлагаас найз н.Мөнхзулаараа дамжуулан 125 сая төгрөг авсан гэх асуудлаар өнгөрсөн онд АТГ-т шалгагдаж байсан билээ. Тодруулбал, Орон нутагт баригдах Соёлын төв, нийслэлийн нэгэн дүүрэгт баригдах цэцэрлэгийн барилгын ажлын тендерийг авч өгнө  хэмээн дээрх мөнгийг авсан байж болзошгүй байгаа юм. Түүнчлэн саяхан “Нэр бүхий сайдын хүү Сингапурт тансаг зэрэглэлийн усан онгоц худалдаж авч, ковид-19 халдварын дэглэмийг зөрчин найз, нөхдөө Сингапурт аваачиж, хоёр сая ам.долларын үнэтэй уралдааны машинаа үзүүлж, усан онгоцон дээрээ тансаг хүлээн авалт зохион байгуулсан” гэх мэдээлэлд түүний нэр холбогдоод авсан. 

Үүнээс гадна өөр нэгэн эх сурвалж “БОАЖ-ын сайд асан Н.Цэрэнбат Х.Улам-Өрнөхийг хууль, хяналтын байгууллагаар шалгагдаж, гэм буруутай нь тогтоогдох, эсвэл өөрийн хүсэлтээр ажлаа хүлээлгэн өгвөл одоогийн албан тушаалд нь томилогдохоор хүлээж байгаа гэсэн. Гэхдээ ойрын хугацаанд Х.Улам-Өрнөх ажлаа хүлээлгэн өгч, Н.Цэрэнбат оронд нь буюу Төрийн өмчийн Бодлого, зохицуулалтын газрын Худалдан авах ажиллагааны газрын даргаар томилогдож магадгүй байгаа” гэсэн юм. Мөн “Сайд асан Н.Цэрэнбат Х.Улам-Өрнөхтэй холбоотой шинэ баримтыг хууль, хяналтынханд өгсөн байх магадлалтай гэсэн” гэлээ.