Монгол Улсын Ерөнхийлөгчийн сонгуульд Ардчилсан намаас нэр дэвшигч С.Эрдэнийн гэргий Н.Нинжбадгартай ярилцлаа. Тэрбээр эдийн засагч мэргэжилтэй, Дүүрэгт ИТХ-д сонгогдож байсан улс төрд багагүй туршлагатай нэгэн билээ.

-Юун түрүүнд ярилцах цаг гаргасанд баярлалаа. Таныг олон нийт УИХ-ын гишүүн асан С.Эрдэнийн эхнэр гэдгээр нь илүүтэй мэднэ. Олны танил хүмүүсийн ар гэр, амьдралын хэв маягийг олон сонирхож байгаа биз ээ.  Магадгүй маш их хариуцлагатай байдаг болов уу?

 

 -Эр хүнийг зөв явахад эхнэр хүн түшиг тулгуур нь байх ёстой гэж боддог.  Тиймээс ар гэр, үр хүүхдүүдээ халамжлан нөхрийнхөө ар талд бат зогсож, амьдралын жаргал зовлон, баяр гуниг бүхий зүйлд нь хамтдаа байх ёстой. Эр, эм болж орчлонг сүлж амьдарна гэдэг тийм амар зүйл биш. 

Анх их эмзэг хүлээж авдаг байсан. Одоо бол арай өөрөөр хүлээж авдаг болж. Худал зүйлийг үнэн болтол бичиж, харлуулах хэрэг хэнд ашигтай байдаг бол гээд өнгөрдөг болсон доо. 

 

-Ерөнхийлөгчийн сонгуульд нэр дэвшихтэй холбоотой янз бүрийн л мэдээлэл гарч байна. Саяхан гэхэд л “С.Эрдэнэ намаа, үнэт зүйлээ МАН-д зарчихсан”, “С.Эрдэнийн биед халдлаа” гэх мэт мэдээлэл гарсаар байна. Ер нь дарамт шахалт, хэл ам их байна уу. Үүнийг хэрхэн даван туулж байна вэ. Таны хань ер нь хэр зөөлөн хүн юм бэ?

- Ер нь их уян зөөлөн хүн. Гаднаас нь хүмүүс өөрөөр хардаг байж магадгүй. Сайн хань гэж би боддог.Цаг зав гарвал гэр бүлтэйгээ байж, хүүхдүүдтэйгээ хамт байхыг чухалчилдаг. Хоол сайн хийнэ. Ялангуяа загас сайхан шарна. Хүүхдүүдтэйгээ зөөлөн, сайхан харилцдаг. Хүнийг хүндэлж чаддаг зан нь надад их таалагддаг. Юманд тууштай, үнэнч. Ер нь зарчмаасаа хазайхгүй. Худалч, хуурмаг занд дургүй. Хүнд хэтэрхий их итгэмтгий. Хүн итгэлийг нь алдсан байсан ч дахиад итгээд байдаг нэг тийм сонин зантай гэх үү дээ. 

 

-Та ханьтай гэр бүл болж байсан түүхээсээ хуваалцахгүй юү?

 

- Бид хоёр хожуу суусан. Хэн хэн нь урд нь амьдралтай байсан. Одоо бид долоон сайхан хүүхэдтэй өнөр өтгөн, эмээ өвөө болоод амьдарч байна. Би хүүхдүүдээ хүний өөрийн гэж ялгаж харьцаж, асуудал үүсгэж байсангүй. Бүгд л миний хүүхдүүд. Би тэдэндээ хайртай. Нөхрийгөө сайн хань, сайн аав, ухаантай эр хүн гэж боддог.  Бид хоёр  хожуу учирч, жаргах ёстой байж.

 

Хүмүүс янз бүрээр ярьж байгаа сонсогддог. Түүнд нь бид огт ач холбогдол өгч байсангүй. Цаашдаа ч тийм байна. Хүний амьдралд олон зүйл тохионо.  Жаргал, зовлон ээлжилж  байдаг хорвоо. Хүн зовъё гэж зовдоггүй. Амьдрал санаснаар болох биш.

 

-Та өөрийн гэсэн карьертай хүн. Гэр бүлдээ хэр анхаарал тавьж чаддаг вэ?  

 

-Би өөрийгөө халамжтай гэж хэлэхгүй. Гэхдээ мэдээж эхнэр хүний, ээж хүний үүргээ сайн гүйцэтгэхийг боддог. Миний амьдралд ах дүү нар минь их дэм болдог.Тэд одоо ч завгүй үед үргэлж тусалдаг. Ажил ихтэй үед өглөө гараад, шөнө гэртээ ирэх тохиолдол олон бий. Энэ бүх үед ар талыг минь тэд зохицуулж тусалдаг. Би аз жаргалыг амьд явахын нэр гэж боддог.

 

Хүн амьд байж хүссэн ажлаа хийж, гэр бүлдээ хайраа зориулж амьдарна гэдэг өөрөө аз жаргал юм. Хүн амьд байгаа нь аз жаргал шүү дээ. Өглөө бүр нарыг харна гэдэг том хувь тохиол. Жаргаж зовохын аль ч үед хүн ноён нуруугаа алдахгүй байх хэрэгтэй. Мэдээж зовохгүй, жаргахгүй хүн гэж байхгүй. Амьд байгаадаа  талархаж сурах ёстой. Бусад нь аяндаа болно.

 

 -Улстөрч хүний гэргий байхад амаргүй, хүнд үе байсан уу. Ийм зүйлд хэр сэтгэлийн хаттай байдаг вэ?

 

-Би чинь элдэв сайн, муу юмыг нэг их тоогоод байдаггүй хүн. Хүн бүр үргэлж эерэг, сөрөг байна гэж байхгүй. Асуудал бүр хоёр талыг дагуулж явдаг шүү дээ. Урт наслахын тулд амар амгалан байж, алив зүйлд бага стрессдэж байх хэрэгтэй гэж боддог. Өөрийгөө өөрөө хайрлахгүй бол өөр хэн хайрлах билээ.

-Гэр бүлийн үнэ цэн юун дээр тогтдог гэж та хардаг вэ?

 

-Гэр бүл бол амьд байгаагийн илэрхийлэл. Миний амьд оршихуйн үргэлжлэл гэж боддог. Мөн хүүхэд ямар хүмүүжил, зан төлөвтэй хүн болж төлөвших нь эцэг эх болон гэр бүлийн доторх дотно харилцаа, уур амьсгалаас шалтгаална. Гэр бол өөрийнхөөрөө байх хамгийн таатай орчин юм. Энд худал хуурмаг зүйл гэж үгүй.

 

-Та хэр шүтлэгтэй вэ?

 

-Шүтлэгтэй. Гэхдээ би шүтлэгтэй хүн гээд сохроор асуудалд хандаад байдаггүй.  Өглөө бүр нарандаа цайны дээжээ өргөж, орой долоон бурхандаа цацал өргөнө. Тэгэхгүй бол энэ чинь одоо тэр их хар, цагаан хэл амыг яаж туулж барах вэ дээ. Хүн чин сэтгэлийн амьтан. Элдэв муу зүйл ирэхээр үр хүүхдээ, хань ижлээ хамгаалж сайн сайхан хүслээ, нарнаас гуйдаг болдог юм байна.

 

-Сонгуулийн сурталчилгааны ажилд нь таны зүгээс хэрхэн тусалж байна вэ?

-Цаг зав гарган ярилцсанд баярлалаа.