Монгол ардын намын бага хурал болж байна. Энэ үеэр УИХ-ын дарга Н.Учрал "Прокурорын байгууллагаас авлига албан тушаалын хэрэгт яллагдагчаар татагдсан УИХ-ын гишүүн Д.Амарбаясгалан, Эрчим хүчний сайд асан Н.Тавинбэх, Үндсэн хууль зөрчсөн нь Үндсэн хуулийн цэцийн дүгнэлтээр тогтоогдсон УИХ-ын гишүүн Х.Булгантуяа, нам дамнасан бүлэглэл байгуулж, нийгмийг эмх замбараагүй байдалд удаа дараа турхиран, МАН-ын бодлого үйл ажиллагааг зохион байгуулалттайгаар гүтгэн харлуулж, намын бодлогыг гуйвуулан завхруулж, намын гишүүний ёс зүй, сахилга, хариуцлагыг уландаа гишгэсэн бага хурлын гишүүн асан, "Монголын үнэн" сонины эрхлэгч асан А.Амундра нарыг МАН-ын гишүүнээс чөлөөлөх нь зүйтэй гэж үзэж байна. Намын үндсэн дүрэмд заасны дагуу эдгээр гишүүдийг МАН-аас түдгэлзүүлэх асуудлыг шийдвэрлүүлэхээр Хяналтын ерөнхий хороонд өнөөдөр албан ёсоор хандаж байна. Урьдын гавьяа зүтгэл, авлига албан тушаалын хэрэг ёс зүйн хариуцлагаас халхлах бамбай болох учиргүй. Шүүхээр гэм буруутай эсэхээ тогтоолгосны дараа МАН-ын гишүүний эрхээ нээлгэх эрх нь нээлттэй. Ийнхүү МАН-д өнөөдрөөс цэгцлэх хөдөлгөөн, ёс зүйн сахилга хариуцлагын цаг хугацаа эргэж эхэллээ. Цаашид ёс зүй, сахилга хариуцлагын зөрчил гаргасан, прокурорын байгууллагаас яллагдагчаар татагдсан, авлигын гэмт хэрэгт холбогдсон, намын нэр хүндийг унагасан, намын бодлого зөрчсөн гишүүдийг  Хяналтын ерөнхий хороо, Ёс зүйн хороонд намын даргын хувиар өгч үе шаттайгаар шийдвэрлэх ёстой гэдгээ мэдэгдэж байна" гэв.