Нийслэлээс шахмал түлшний 400 борлуулалтын цэгээр худалдаалж байгаа түлшний нийлүүлэлтийг хоёр дахин нэмээд байна. Гэвч шахмал түлшийг хэд дахин өндөр үнээр дамлан зардаг ченжүүд, “түлш зарна” гээд иргэдийг хууран мэхлэгсэд, түлшийг нөөцөлж зардаг бүлэг хүмүүс бий болжээ.

     Энэ талаар олон нийтийн сүлжээнд бичихдээ “10 шуудай түлшийг 90 мянган төгрөгөөр буюу нэг шуудайг нь 9000 мянган төгрөгөөр зарна”, “Нэг шуудай түлшийг 20 мянган төгрөгөөр зарна гэнэ. 3750 төгрөгийн түлшийг хэд ч нугалж зардаг юм”, “Хуучин түлшийг 5000 төгрөг, шинэ түлшийг 7000 төгрөгөөр зарна гэнэ”, “Шахмал түлшийг 4000 төгрөгөөр авъя. Наймаачид ядарсан иргэдээ арай л шулах юм аа. 20 мянган төгрөгөөр зарах бол арай шүү” зэргээр бичсэн байна. Шахмал түлшийг нөөцөлж, өндөр үнээр зарж, зохиомол хомсдол үүсгэж, иргэдийг төөрөгдүүлж байгаа асуудлыг хууль, хяналтын байгууллагаас шалгаж буй аж.