Ерөнхий сайд Л.Оюун-Эрдэнэ, Шадар сайд С.Амарсайхан нар Онцгой байдлын ерөнхий газарт ажиллаа. Ерөнхий сайд “Өнөөдөр та бүхнийг магтах гэж ирээгүй. Өнгөрсөн хугацаанд хийсэн ажилдаа дүгнэлт хийх гэж ирсэн.

Өвөлжилт хүндэрнэ гэдэг бол нэг асуудал. Цар тахал бол цогц асуудал гэдэг дээр алдаа гаргасан. Эрүүл мэндийн байгууллага, онцгой байдал, онцгой комисс хоорондоо уялдаа холбоо муу ажилласан. Иргэдтэйгээ хамтарч ажиллах боломжийг ашиглаж чадаагүй. Тийм учраас ажлын арга барил, хандлагадаа өөрчлөлт хийх зайлшгүй шаардлагатай байна. Нэгдүгээрт, вакцин оруулж ирэх ёстой. Хэрхэн, яаж зохион байгуулж оруулж ирэх вэ. Хоёрдугаарт, өвөлжилт хүндрэх нь ээ. Үүнд бэлэн байна уу. Газар хөдлөлт боллоо. Яагаад үүнийг Засгийн газарт мэдэгдсэнгүй вэ. Өглөө нь утасдахад хүчний байгууллага мэдээлэлгүй байсан. 

Тэгэхээр цар тахлыг хөөх биш, урьдчилан сэргийлэх арга хэмжээ авах ёстой. Тийм учраас цар тахлыг цогцоор нь даван туулах үүргийг Шадар сайдад өгөөд байна. Засгийн газрын лхагва гарагийн хуралдаанд эхний ээлжийн төлөвлөгөөгөө танилцуулаарай. 

Уламжлалт сэтгэлгээнээсээ сал. Улсын онцгой комисс зөвхөн цар тахал, халдвар хамгааллаа яриад, Сангийн яам зөвхөн эдийн засгаа яриад байхар хоорондоо уялдаж ажиллахгүй байна. Цогц төлөвлөгөө танилцуулах хэрэгтэй. Улсын онцгой комисс хэрэгжүүлэх шатандаа задгайраад байна.  Энэ юунаас болоод байна вэ. УОК, НОК хамтарч ажиллаарай. Асуудал цогц учраас шийдэл цогц байх хэрэгтэй. Би өдөр бүхэн мэдээлэл авч ажиллах болно. Маш хурдтай, эргэх холбоотой, ёс зүйтэй, шинэ хандлагаар ажиллах шаардлагатай байна. Тэгж ажиллаж чадахгүй бол хариуцлага тооцно. Өнгөрсөн хугацаанд нойр хоолгүй ажилласныг чинь мэднэ. Гэхдээ өнгөрсөн алдаагаа давтахгүйг хичээж, цар тахлаа даван туулах ёстой. УОК нь нэг мэдээлэл өгдөг, НОК нь өөр мэдээлэл өгдөг. Хэн нь албан ёсны мэдээ өгөх вэ гэдгээ тогтох хэрэгтэй” гэлээ.