Маргаашнаас “Улаанбаатар хотын хэмжээнд тэг зогсолт хийх гэж байна” гэх мэдээлэл цахим сүлжээгээр гараад байна. Тэгвэл энэ талаар Улсын онцгой комисс, Засгийн газар хуралдаагүй бөгөөд тэг зогсолт хийх талаар яриагүй гэдгийг Засгийн газрын Хэвлэл мэдээлэлтэй харилцах хэлтсээс мэдээллээ. 

Гамшгаас хамгаалах тухай хуульд тэг зогсолт хийх талаар дурдаагүй бөгөөд гамшгаас хамгаалах бэлэн байдал нь дараах зэрэгтэй байна. Үүнд:

10.1.1.өдөр тутмын бэлэн байдал;
10.1.2.өндөржүүлсэн бэлэн байдал;
10.1.3.бүх нийтийн бэлэн байдал.

Өөрөөр хэлбэл нийслэлд өнөөдрийн байдлаар гамшгаас хамгаалах бэлэн байдлын хамгийн өндөр зэрэгт байгаа юм.

Харин тэг зогсолтын тухайд хуульд заагаагүй бөгөөд хэрэв одоо тогтоосон зэрэглэлээс хүндэрнэ гэж үзвэл ОНЦ БАЙДАЛ зарлана. Энэ талаар Онц байдлын тухай хуульд улсын нийт нутаг дэвсгэрт буюу зарим хэсэгт нь оршин суугаа хүн амын амь нас, эрүүл мэнд, аж амьдрал, нийтийн аюулгүй байдалд шууд аюул учруулсан буюу учруулахуйц гамшиг, гамшгийн онцгой нөхцөл байдал  тохиолдсон үед онц байдал зарлана.

Онц байдал зарлах тухай асуудлыг Монгол Улсын Ерөнхийлөгч, Засгийн газар, эсвэл УИХ-ын нийт гишүүний дөрөвний нэгээс доошгүй хүний санаачилгаар хэлэлцэж шийдвэрлэнэ. Хэрвээ хойшлуулалшгүй тохиолдолд ҮАБЗ-ийн зөвлөмжөөр Ерөнхийлөгч Онц байдал зарлах тухай зарлиг гаргадаг аж.