“Эргэлт” сэтгүүл Дархан цаазат Богдхан уулын амны газрыг дамлаж зарсан газрын наймаачдыг, хувийн харш, хаус хотхон босгосон хууль завхруулагчдыг, хариуцлага тооцохгүй хамгаалж, хамтарч ирсэн эрхтэн, дархтнуудыг хөдөлшгүй баримтаар танилцуулж байна. Бид Богдхан уулын 28 амыг зүүнээс нь баруун тийш “самнаж”, тэдгээр аманд баригдсан 3.2 их наяд төгрөгийн үнэтэй, 2500 орчим хаус, харш, барилгын эздийг шүүж, хамгийн “том” эзэнтэй 40 хаус хотхон, 10 орон сууцны хотхон, 20 гаруй хувийн харшийг танилцуулахаар бэлтгэлээ. Дамаа, сүүлийн дөрвөн жил авлигачин албан тушаалтнууд, алт, нүүрснийхэн, оффшорчид, койнчид хэлэлцэж тохирсон юм шиг Богдхан уул руу хошуурцгааж, хаус, хотхонуудыг хаяа нийлүүлэн барьцгаасан байгааг онцлох нь зүйтэй байх.  

    Арцатын аманд УИХ-ын гишүүн Кёкүшюүзан Батбаярын эзэмшдэг газруудын дунд “Монпластик солюшн” ХХК 4.0 га газар эзэмшдэг. Тус газар дээр тансаг зэрэглэлийн зургаан хаус   баригдсан.

     Хамгийн ноцтой нь, “Монпластик солюшн” ХХК-ийг Улсын Ерөнхий прокурор асан М.Энх-амгалангийн төрсөн дүү Магванноровын Бат-Амгалан эзэмшдэг. Газрын наймаа, залилан, мөнгө угаалтын хэргээр хууль хяналтын байгууллагад олон жил ээрэгдэж яваа ч ял авахгүй дэнжигнэсээр өдий хүрч буй Кёкүшюүзан Батбаярын эзэмшил газруудтай хаяа залгаад Улсын ерөнхий прокурор М.Энх-Амгалангийн төрсөн дүү 4.0 га газартай болж, айлссан нь санаандгүй тохиолдол уу, эсвэл ард нь асар том “авлига”-ын сэжүүр нуугдаж байна уу гэдгийг хууль хяналтынхан шалгах нь зүйтэй биз ээ.