Өнгөрсөн долоо хоногийн УИХ-ын чуулганаар УИХ-ын гишүүн Ц.Анандбазар УИХ-ын гишүүн Б.Бат-Эрдэнийг хүн чанар, ёс зүй сайтай хэмээн магтсан билээ. Тэрбээр “Б.Бат-Эрдэнэ аварга маань Монгол наадмын зүлэг ногоон дэвжээнээ хамгийн жудаг сайтай бөх байсан. УИХ-ын гишүүн болсон ч хүн чанар хүний мөсөөрөө манлайлж байна. Б.Бат-Эрдэнэ аварга шиг таван гишүүнтэй болчихвол манай парламентын өнгө сайхан болно” хэмээж байв. Тиймдээ ч олон түмнээ Дархан аварга хэмээн хүндлэгдсэн УИХ-ын гишүүн Б.Бат-Эрдэнэ УИХ-ын Ёс зүй, сахилга хариуцлагын байнгын хороог даргалдаг байж болох юм. 

Гэтэл Ёс зүйн хорооны дарга өөрөө ёс зүйн зөрчил гаргасан уу эсвэл ажлаа хэтэрхий сайн хийсэн үү гэх асуудал Төрийн ордонд үүсээд байгаа аж. Тодруулбал, Улаанбаатар төмөр замын Зорчигч тээврийн төвийн үйлдвэрчний эвлэлийн хорооны дарга Г.Өлзий-Орших УИХ-ын нэр бүхий гишүүдийг уучлал гуйхыг шаардаж, ёс зүйн хариуцлага тооцуулж өгөхийг хүссэн бичгийг УИХ-ын Ёс зүйн байнгын хороонд ирүүлсэн байна. Тус бичигт “УИХ-ын зарим гишүүд олон нийтийн сүлжээгээр УБТЗ-ын 16 мянган ажилчдын нэр хүндэд халдаж, хөдөлмөр бүтээлийг нь үгүйсгэж гутаан доромжилсон тул олон нийтийн сүлжээгээр УБТЗ-ын ажилчдаас уучлал гуйхыг шаардаж байна” гэжээ. 

Харин байнгын хорооны дарга Б.Бат-Эрдэнэ хариу илгээхдээ “УИХ-ын гишүүн Ж.Сүхбаатар, Б.Энхбаяр нартай биечлэн уулзаж, гишүүдэд ёс зүйн асуудлаар сануулга өгсөн, нам, засгийн бодлогын эсрэг хууль зөрчсөн үйлдэлд нь хариуцлага тооцуулахаар МАН-ын бүлгийн дарга Д.Тогтохсүрэнд шилжүүлсэн” гэжээ. 

Гэтэл Б.Энхбаяр, Ж.Сүхбаатар нар Ёс зүйн хорооны дарга Б.Бат-Эрдэнэтэй огт уулзаагүй, сануулга авсан зүйл байхгүй гэдгээ илэрхийлсэн байна.

Тухайлбал, УИХ-ын гишүүн Б.Энхбаяр “УИХ-ын гишүүдтэй уулзаа ч үгүй, өөрийгөө “ЁС ЗҮЙ” гэж итгэн, УИХ-ын албан бланкыг ашиглан шүүхээр ял шийтгүүлсэн авлигач этгээдээс уучлал гуйсан Б.Бат-Эрдэнэ гишүүнээс даруй тайлбар авч, нэр бүхий хуулийн дарга нарын ах, дүү нарын мафи бүрдүүлсэн Төмөр замын мафид хариуг нь өгнө. Авлигачийн өмнө бөхийдөг ёс зүй гэж хаа ч байхгүй” хэмээн цахим хуудаснаа бичсэн бол УИХ-ын гишүүн Ж.Сүхбаатар “Надтай бас хэн ч уулзаагүй. Ёс зүйгүй үйлдэл гаргаагүй тул хууль биелүүлж ажиллах шаардлага тавих бүрэн эрхээ эдэлсний төлөө авлигачаас уучлал эрэх өчүүхэн төдий ч үндэслэл байхгүй. Харин хууль биелүүлж ажиллахыг төмөр замын салбарын удирдларгаас хатуу шаардсаар байх болно” гэжээ. 

УБТЗ-аас УИХ-ын Ёс зүйн дэд хороонд ирүүлсэн албан бичиг