Засгийн газраас өргөн мэдүүлсэн Гадаадын иргэний эрх зүйн байдлын тухай хуульд нэмэлт, өөрчлөлт оруулах тухай хуулийн төсөл болон дагалдуулан өргөн мэдүүлсэн хуулийн төслүүдийг өнөөдрийн чуулганы хуралдаанаар хэлэлцсэн. Энэ үеэр хэд хэдэн ноцтой баримтыг албаныхан хэлж байсан. Тухайлбал, УИХ-ын гишүүн Л.Энх-Амгалан  БНХАУ-ын Засгийн газрын санхүүжилттэй хакерын бүлэглэл Монгол Улсын төрийн 440 байгууллага харилцдаг "Able" системд халдсан талаар хэлсэн юм. Үүн дотроо ХЗДХЯ, Ерөнхийлөгчийн тамгын газар зэрэг төрийн бусад байгууллагын албан бичиг хөтөлдөг программ руу гаднаас халджээ.

Мөн хар тамхи зөөвөрлөсөн дипломат ажилтнуудын хэрэг илэрсэн учраас Элчин сайдын албан хэрэгцээнд явдаг автомашинд GPS суурилуулан хянадаг болсон байна. Түүнчлэн тамхи хууль бусаар зөөсөн хэрэгт холбогдсон 69 албан тушаалтныг ажлаас нь чөлөөлж хуулийн байгууллагад шилжүүлээд байгаа аж. Харин ГХЯ-наас 2013-2020 онд олгосон дипломат гадаад паспортуудыг шат дараатай хүчингүй болгох ажлыг хийсэн байгаа гэлээ.