УИХ-ын гишүүн Д.Цогтбаатар, Төсвийн байнгын хорооны дарга Г.Тэмүүлэн, ХНХ-ын сайд Х.Булгантуяа, УИХ-ын гишүүн С.Ганбаатар, Түгжрэлийг бууруулах үндэсний хорооны дарга, УИХ-ын гишүүн Ж.Сүхбаатар нар “Парламент-Ток”нэвтрүүлэгт оролцож, улс төр нийгмийн асуудлаар ярилцсан. Тэгвэл энэ үеэр үнийн өсөлт, ард иргэдийн амьжиргааны түвшинд ямар хүндрэл үүссэн талаар гишүүд байр сууриа илэрхийллээ.

УИХ-ЫН ГИШҮҮН С.ГАНБААТАР: Ард түмний амьдрал хүнд, цалин тэтгэвэр нэмэх нь зөв. Нэг сая төгрөг иргэний халаасанд байлаа гэхэд 400 мянган төгрөг нь үнийн хөөрөгдөлд идэгдээд байна. Төгрөгийн худалдан авах чадварыг тогтвортой доод түвшинд барих үүргийг Монголбанк, Засгийн газар хүлээсэн.

УИХ-ЫН ГИШҮҮН Ж.СҮХБААТАР: Төр хэзээ ажлаа хийх вэ. Махны үнэ өндөр байна гэдэг асуудлыг иргэд ярьж байгаа. Юмны үнэ өсөж байна гэдэг дээр бид анхаарал хандуулаад байж болохгүй.

УИХ-ЫН ГИШҮҮН Д.ЦОГТБААТАР: АНУ саяхан дефольт болох дөхсөн. Тэнд юу болсон гэхээр парламент Засгийн газрынхаа оруулж ирсэн бодлогыг дэмжихгүй гацааж байгаагаас дефольт үүсэх гээд байна.  Их хурлын зүгээс Засгийн газраас оруулж ирж байгаа нэг ч хуулийн төслийг гацааж байгаагүй. Цар тахлын үед ч бид цахимаар хуралдаад асуудлыг шийдэж байсан. 

ХНХ-ЫН САЙД Х.БУЛГАНТУЯА: Мах, хүнсний ногоо, шатахуун, сүү энэ бүтээгдэхүүнүүд инфляц  хөөрөгдөхөд 40-50 хувь нөлөөлсөн. Засгийн газар гол нэрийн бараа бүтээгдэхүүний хангалт, чанар дээр анхаарахаар 2022 оны төсөвт хөрөнгө суулгасан.

УИХ-ЫН ГИШҮҮН Д.ЦОГТБААТАР: Шинэ Үндсэн хуулийн өөрчлөлтөөр хамгийн нөлөө бүхий институт нь Засгийн газар болсон. Төсөв бол эдийн засагт хамгийн нөлөөтэй хүчин зүйл болжээ. Сангуудын мэдээллийг Их хурлын гишүүд авч чадахгүй болсон. Яагаад өгөхгүй байсан бэ гэдэг нь сая ил боллоо.

ХНХ-ЫН САЙД Х.БУЛГАНТУЯА: Зах зээлийн өрсөлдөөнийг бий болгохын тулд Засгийн газар бодлогоор ч дэмжиж байна, үйл ажиллагааны хүрээнд ч дэмжиж байна. Бид үүнийг 30 жилийн алдаа ч гэж тайлбарлаж байгаа. Эдийн засгийн бүтцийг өөрчлөх гэж бид явж байна. Тэгж байж өргөн хэрэглээний бараа бүтээгдэхүүний үнэ буурна.

Д.ЦОГТБААТАР: Бид тэгж ойлгож болохгүй. Өнөөдрийн үнийн өсөлтийг 1990 оны үйл явдалтай холбож болохгүй. Өнөөдрийн өсөлт энэ жилд болсон үйл явдлуудаас ил болж байна.