Өнгөрсөн дөрөвдүгээр сарын 28-нд Колумб улсад цар тахлын улмаас үүссэн ядуурал болон тэгш бус байдлыг эсэргүүцсэн жагсаал өрнөсөн билээ. Тэгвэл уг жагсаал хоёр дахь долоо хоногтоо үргэлжилж буй бөгөөд нийт 37 хүн амиа алдаж, 89 хүн сураггүй алга болсон хэмээн хүний эрхийн төрийн бус байгууллага мэдээлжээ.

Тус эсэргүүцлийн жагсаалыг цагдаа нар хүч хэрэглэн тараахыг оролдож буй аж. Өнгөрсөн лхагва гарагт Богота болон бусад хотод сум нэвтэрдэггүй хантааз өмссөн цагдаа нар жагсагчид руу нулимс асгаруулагч хий болон тэсрэх бөмбөг шидэж, усан буугаар буудсан байна. Эрх баригчдын баталсан татварын шинэчлэлийг эсэргүүцэн иргэд жагссан боловч үүний дараа ядуурал болон хүний эрхийн асуудал хөндөгджээ.

Уг жагсаалд оролцсон оюутан Мария Лопез “Бид тайван жагсаал өрнүүлж, бидэнд ирээдүй бий гэдгийг л мэдэхийг хүсэж байна. Гэвч тэд хэзээ ч биднийг сонсдоггүй” хэмээн ярилцлага өгчээ.