АНУ-ын Ерөнхийлөгч Дональд Трамп нэгдүгээр сарын 26-наас Их Британи, Бразил болон Европын улсуудад аялах хоригийг цуцлах шийдвэр гаргасан билээ. Харин уг шийдвэрийг АНУ-ын шинэ Ерөнхийлөгч Жо Байдены хэвлэлийн төлөөлөгч эсэргүүцэн “Дональд Трампын тушаалыг үл харгалзан аялах хоригийг хэвээр үлдээнэ. Хоригийг хөнгөвчлөх цаг болоогүй” хэмээн мэдэгдэв.

АНУ өнгөрсөн жилийн гуравдугаар сард Европын орнуудад, тавдугаар сард Бразил руу хил нэвтрэхийг хориглоод байсан билээ. Харин Байдены хэвлэлийн төлөөлөгч “Бид коронавирусийн тархалтыг бууруулах үүднээс аялал жуулчлалыг чангатгахыг хичээж  байна” хэмээн мэдээлжээ.

Гэвч энэ мэдэгдлээс хэдхэн минутын дараа Ерөнхийлөгч Дональд Трамп Их Британи, Бразил болон Европын холбооны улсуудад тавьсан хоригийг цуцалсан тушаалд гарын үсэг зуржээ. Энэхүү цуцлах шийдвэрт коронавирусийн шинжилгээ өгсөн байх, коронавирус туссан бол эдгэсэн гэсэн баталгааны бичигтэй нэвтэрнэ гэжээ.