“Парис-2024” олимпын наадмын нээлтийн ёслол, зохион байгуулалттай холбоотой асуудлаар БНХАУ-ын тал баг, тамирчдаа олимпын наадмаас татсан гэх мэдээлэл цахим сүлжээнд түгээд байна. Тухайлбал, олимпын нээлтийн ёслолын үеэр соёл иргэншил, ёс суртахуунаар ялгаварласан байж болзошгүй үзүүлбэр үзүүлсэнтэй холбоотойгоор Хятадын эрх баригчид тамирчдаа олимпод оролцуулалгүй татах шийдвэр гаргасан гэх мэдээлэл гарч буй. Тэгвэл үүнтэй холбоотой албан мэдэгдэл, мэдээлэл Олон улсын олимпын хороо, БНХАУ-ын Гадаад хэргийн яам, БНХАУ-ын Олимпын комиссын албан ёсны вебсайт, пэйж хуудсаар гараагүй байгаа бөгөөд Олон улсын олимпын хорооны мэдээллээр БНХАУ-ын баг, тамирчид Парисын олимпын наадамд оролцож байна.

“Парис-2024” олимпы наадмын хоёр дахь өдрийн буюу өчигдрийн байдлаар БНХАУ нийт зургаан медаль хүртсэн амжилттай яваа аж. Тодруулбал, өчигдөр болсон олимпын байт харвааны эмэгтэйчүүдийн төрөлд БНХАУ-ын баг мөнгөн медаль хүртсэнээр тус улсын баг тамирчид нийт гурван алт, нэг мөнгө, хоёр хүрэл медаль хүртээд байгаа юм.