Далайн түвшнээс дээш 8848 метрийн өндөр оршдог дэлхийн ноён оргил Гималайн нурууны Күмбу Гимал хэсэгт орших Эверестийн оргилд хамгийн олон удаа авирсан амжилтыг Балбын уулчин шинэчлэн тогтоожээ. Тодруулбал, орон нутгийн цагаар ням гарагийн 07:30 цагт Балбын уулчин Ками Рита Шерпа Эверестийн 8849 метрийн оргилд хүрсэн бөгөөд уулчин 29 дэх удаагаа тус ноён оргил дээр гарснаараа дэлхийн дээд амжилтыг шинэчлэн тогтоосон байна. Өдгөө 54 настай Балбын уулчин Ками Рита Шерпа анх 1994 онд Эверестийн оргилд гарч байсан бөгөөд түүнээс хойш 20 гаруй жил Гималайн нуруунд хөтчөөр ажиллаж, жилийн хамгийн тохиромжтой улирлыг хүлээн Эверестийн оргилд гарах болсон гэнэ.

Ташрамд дурдахад, Эверестийн оргилд өнгөрсөн 2023 онд 600 гаруй хүн хүрчээ. Гэсэн ч дэлхийн дулаарал, уур амьсгалын өөрчлөлттэй холбоотойгоор Эверестийн оргилд авирах улам хүндрэлтэй болж байгаа бөгөөд өнгөрсөн жилд 18 уулчин амиа алдсан талаар холбогдох байгууллагаас анхааруулсан байна.