ОХУ, Украины мөргөлдөөн эхэлснээс хойш 31 мянга гаруй украин цэрэг амь үрэгдээд байгаа талаар Ерөнхийлөгч Володимир Зеленский мэдэгджээ.

                              Зүүн Европт ОХУ, Украин хоёрын мөргөлдөөн эхэлснээс хойш амиа алдагсдын тоон мэдээллийг нууцалж ирсэн. Олон улсын зарим хүний эрхийн байгууллага таамаг мэдээлэл гаргаж байснаас аль нэг орны албаны эх сурвалж мэдээллийг нууцалдаг байсан. Тэгвэл сүүлийн үед ОХУ-ын Ерөнхийлөгч Владимир Путин орон нутгийнхаа хэвлэлээр 150-300 мянган украин цэрэг нас барсан гэх мэдээлэл хийж байгаатай холбоотойгоор Украины Ерөнхийлөгч Володимир Зеленский 31 мянга гаруй цэрэг амь үрэгдсэн гэж мэдэгджээ. Ингэхдээ Ерөнхийлөгч В.Зеленский шархадсан цэргүүдийн талаар мэдээлээгүй бөгөөд “В.Путин амь үрэгдсэн украин цэргүүдийн талаар худал мэдээлж байна. Түүний болон тойрон хүрээллийнх нь худал мэдээлэлд итгэхгүй байхыг хүсье. Гэсэн ч 31 мянган цэрэг гэдэг ч бидний хувьд маш том гарз болсон” гэсэн байна.

АНУ-ын албаны хүмүүс өнгөрсөн оны наймдугаар сард хоёр орны мөргөлдөөнд 70 мянган украин цэрэг амь үрэгдэж, 120 мянга гаруй шархадсан гэж мэдээлсэн. Харин Украины Ерөнхийлөгч Володимир Зеленский хийсэн мэдэгдлээрээ Америкийн талын мэдээллийг ч үгүйсгэсэн бөгөөд Оросын талаас 180 мянга гаруй цэрэг амь үрэгдсэн талаар мэдээлжээ.