Оросын сөрөг хүчний удирдагч Алексей Навальный өнгөрсөн долоо хоногт хатуу дэглэмтэй хорих ангид нас барсан. Нас барснаас хойш талийгаач цогцсыг ар гэрийнхэнд нь хүлээлгэж өгөөгүй байгаа бөгөөд А.Навальныйгийн хэвлэлийн төлөөлөгч “Оросын эрх баригчид А.Навальныйг хөнөөчихөөд ул мөрөө баллах гэж байна” хэмээн мэдэгдээд байгаа. Тэгвэл өнгөрсөн долоо хоногт болсон хэрэгтэй холбоотойгоор Их Британий талаас А.Навальныйгийн хоригдож байсан хорих ангид арга хэмжээ авчээ.

                             Тухайлбал, чанга дэглэмтэйгээ зартай Оросын хорих ангийн дарга, хурандаа Вадим Константинович Калинин нарын зургаан албан тушаалтны эсрэг Их Британи хориг арга хэмжээ авсан байна. Их Британийн хүний эрхийн байгууллагуудын мэдээлснээр хорих анги А.Навальныйг хуулийн дагуу хориогүй бөгөөд хоригдож байх хугацаанд нь хоёр долоо хоног хүртэлх хугацаагаар ганцаарчлан гянданд хорьсон аж. Түүнчлэн Европын удирдлагууд Оросын эрх баригчид иргэдийн гашуудлын үйл ажиллагааг зогсоох гэж оролдож байгааг шүүмжилжээ.