Эквадорын телевизийн шууд нэвтрүүлгийн үеэр зэвсэглэсэн этгээдүүд халдаж, сэтгүүлч, ажилтнуудыг барьцаалжээ. Тодруулбал, Эквадорын Гуаякил хотын “ТС” сувгийн шууд нэвтрүүлгийн студи руу зэвсэглэсэн этгээдүүд халдсан байна. Шууд нэвтрүүлэг зогсох хүртэлх студийн дүрс бичлэг орон нутгийн телевизээр цацагдсан бөгөөд зэвсэглэсэн этгээдүүд сэтгүүлч, ажилтнуудыг тодорхойгүй шалтгааныг улмаас баривчлаад байгаа гэнэ.

Одоогийн байдлаар цагдаа болон тусгай байгууллагын алба хаагчид телевизийн студийг бүслээд байгаа юм байна. Харин орон нутгийн телевизийн сэтгүүлч, ажилтнуудыг барьцаалсан этгээдүүдийн зүгээс ямар нэгэн шаардлага тавиагүй бөгөөд гаднын хэвлэлүүд уг халдлагыг саяхан Эквадорын шоронгоос оргосон Чонеросын бүлэглэлийн толгойлогчтой холбоотой байж болзошгүй хэмээн мэдээлжээ.