БНСУ-ын сөрөг хүчний намын дарга Ли Жэ Мён Бусан хотод хийж буй айлчлалынхаа үеэр хүзүүндээ хутгалуулж, эмнэлэгт хүргэгджээ. Тодруулбал, Бусан хотод баригдаж байгаа шинэ нисэх онгоцны буудлын барилгын ажилтай танилцаж, сэтгүүлчдэд мэдээлэл өгч байхад нь нэгэн үл таних этгээд Ли Жэ Мёнд халдаж, хүзүү тус газар нь хутгалсан байна. Солонгосын Ардчилсан намын хэвлэлийн төлөөлөгчийн өгсөн мэдээллээр тус намын даргыг нэн даруй эмнэлэгт хүргэсэн бөгөөд одоо Сөүлийн үндэсний их сургуулийн эмнэлэг рүү шилжүүлж, яаралтай хагалгаа хийхээр болоод байгаа аж.

БНСУ-ын Ардчилсан намын төлөөлөгчид тус намын дарга Ли Жэ Мёнийг хөнөөхийг завдсан уг үйлдлийг “Ардчилалд ноцтой халдаж байгаа хэрэг”, “Терроризм” хэмээн орон нутгийн хэвлэлээр мэдэгдээд байгаа юм байна.