АНУ-ын төрийн өндөр албан тушаалтнууд Исламын Бүгд Найрамдах Иран Улсын төлөөлөгчидтэй своп хэлцэл хийж, үр дүнд хүрснээр тус улсад хоригдож байсан таван иргэн суллажээ. Тодруулбал, хоёр орны хоригдол солилцох ажиллагаа Катарын Доха хотод болсон бөгөөд АНУ Ирантай зургаан тэрбум ам.доллар буюу 4.8 тэрбум фунтийн гэрээ байгуулсан бөгөөд мөнгө Доха дахь Ираны банкнуудад шилжсэнээр Ираны талаас АНУ-ын төлөөлөгчдөд таван хүнийг шилжүүлэн өгсөн байна. Олон улсад барьцааны хүмүүс гэж тооцогдож Ираны шоронд найман жилийн турш хоригдож, сая суллагдсан таван иргэний дотор өдгөө 51 настай бизнесмен Сиамак Намази, Их Британийн иргэншилтэй 59 настай бизнесмен Эмад Шарги, 67 настай байгаль хамгаалагч Морад Тахбаз нар багтсан аж.

Мөн Ираны шоронгоос суллагдсан таван хүнийг Вашингтон хотод АНУ-ын төрийн дээд албан тушаалтнууд хүлээн авч уулзах хөтөлбөртэй байгаа юм байна. Харин АНУ-ын талаас тус улсад хоригдож байсан Ираны таван иргэнд өршөөл үзүүлж, сулласан ч “Эргэж Иранд очихгүй” хэмээн мэдээлсэн гэнэ.