БНЭУ-ын нийслэл Шинэ Дели хотод зохион байгуулсан “Их 20”-ийн бүлгийн уулзалт өндөрлөжээ. Тус бүлгийн энэ удаагийн уулзалтад бүлгийн орнуудын Гадаад хэргийн сайд нар оролцож, олон талт үзлийг бэхжүүлэх, хүнс, эрчим хүчний аюулгүй байдлыг хангах, жендэрийн асуудал, терроризмтой тэмцэх асуудлаар хэлэлцсэн. Харин БНЭУ-ын Ерөнхий сайд Нарендра Моди уулзалтад оролцож, Гадаад хэргийн сайд нар уур амьсгалын өөрчлөлт, өрийн асуудлаар тохиролцоонд хүрч болзошгүй хэлэлцээрийг орхигдуулахгүй байхыг уриалсан байна.

                               Тэгвэл “Их 20”-ийн бүлгийн уулзалтын төгсгөлд ОХУ, Украины дайнтай холбоотой асуудал ч хөндөгджээ. Уулзалт болохоос өмнө АНУ-ын Төрийн нарийн бичгийн дарга ОХУ-ыг “Ямар ч үндэслэлгүй дайн хийж байна” хэмээн буруушаасан. Тэгвэл “Их 20”-ийн уулзалтад ОХУ-ны Гадаад хэргийн сайд Сергей Лавров барууны орнуудыг “Шантааж хийж, заналхийлж байгаа”-г онцолсон байна. Энэ удаагийн “Их 20”-ийн бүлгийн уулзалтыг удирдан явуулсан БНЭУ-ын тал геополитикийн асуудалтай орнуудад анхаарлаа хандуулахыг хүссэн ч ОХУ, Украины талаарх “Их 20”-ийн бүлгийн зөрчилдөөнтэй саналыг эвлэрүүлэх боломжгүй тухай мэдэгджээ.