-Төв аймагт хоригдож байхад охин минь автомашины ослоор нас барсан. Энэ нь сэтгэл зүйгээр минь дарамталж, намайг хэрэг хүлээлгэх гэсэнтэй холбоотой-

       УИХ-ын гишүүн, Дэд бүтцийн хөгжлийн сайдын үүрэг гүйцэтгэгч С.Зориг агсныг бүлэглэж, шунахайн сэдэлтээр, захиалгаар, онц харгис хэрцгий аргаар санаатай хөнөөсөн хэрэгт Т.Чимгээ, Б.Содномдаржаа, Ц.Амгаланбаатар нарыг буруутгаж, хорих ялаар шийтгэсэн. Уг хэрэг зургаан удаа шүүхээр орсон ч шийдвэрлэгдээгүй байгаа юм. С.Зоригийг хөнөөсөн хэрэгт буруутгагдаж, 20 жилийн хорих ял авч, хорих 401 дүгээр ангид хоригдож байгаа Т.Чимгээтэй Ерөнхий сайд Л.Оюун-Эрдэнэ өнөөдөр уулзлаа. Энэ үеэр Т.Чимгээ хэвлэлд яриа өгсөн юм. Тэрбээр 

“Анх намайг ариун цэврийн хэрэглэл байхгүй, агааржуулалтгүй, хорих өрөөнд есөн сар хорьсон. Дарамт шахалтад явсаар байгаад жил гаран хоригдсон. Тэд миний амьдралыг орвонгоор нь эргүүлсэн. Таван жил долоон сар тарчлаан зовоож, тамлаж байсан. Жилийн дараа Төв аймагт хоригдож байхад том охин минь автомашины осолд орж, амиа алдсан. Би охиныхоо амиа алдсан хэргийг энэ хэрэгтэй холбоотой гэж үзэж байгаа. Үлдсэн үр хүүхдүүд минь таван жил долоон сар орон гэргүй байр хэсэж амьдарч байна”

гэв.

Түүнчлэн 

“Намайг хэрэгт буруутай гэсэн нотлох баримт байдаггүй. Тэд Ц.Амгаланбаатарын үгийг л нотлох баримт болгосон. С.Зориг агсны амиа алдсан 1998 оны аравдугаар сард би Дорноговь аймагт ээж дээрээ байсан. Дорноговь аймагт гурван сарын турш байсныг минь нотлох баримт байгаа”

гэлээ.