Талийгаач Э-ийн амийг аврах гэж оролдсон Сүхбаатар дүүрэг дэх Цагдаагийн газрын алба хаагч, дэд ахлагч Б.Даваажав хэргийн талаар мэдээлэл өглөө. Тэрбээр “Өнөөдөр Сүхбаатарын талбайд үүрэг гүйцэтгэж байх хугацаанд талбайн баруун хэсгээс нэг хүн хашхирсан. Тэр хүнийг ажихад сэжиг бүхий санагдаад шалгахаар очиж явтал гэнэт гал асаад эхэлсэн. Би тэр хүнээс ердөө хоёрхон алхмын зайтай явж байсан юм. Чадахаараа галыг унтраах гэж хичээсэн боловч харамсалтай нь тэр хүний амийг аварч чадсангүй. Үнэхээр маш харамсалтай байна. Ойр хавьд явж байсан хэд хэдэн хүн надад ирж тусалсан.  Талийгаач тухайн үед юу гэж хэлснийг би сайн сонсоогүй. Маш хурдан, хэдхэн секундын хооронд л болсон үйл явдал. Ямар ч гэсэн тэр хүнийг “аварчих юм сан” л гэж бодож албан үүргээ гүйцэтгэсэн. Миний биеийн байдал хэвийн байгаа. Түлэгдэж, гэмтсэн зүйл бараг байхгүй” хэмээлээ.