Өнгөрсөн амралтын өдрүүдэд буюу нэгдүгээр сарын 2-3-нд Тээврийн цагдаагийн албаны жижүүрийн шуурхай хэлтэст 244 дуудлага бүртгэгджээ. Үүнээс зам тээврийн 177 дуудлага ирсэн байна. Зам тээврийн ослын улмаас дөрвөн хүн гэмтжээ. Тодруулбал, нэгдүгээр сарын 2-нд Сонгинохайрхан дүүргийн XX хороо Толгойтын зам, Тэнүүн төвийн баруун замд “Toyota Prius” маркийн жолооч У нь согтуурсан үедээ тээврийн хэрэгсэл жолоодож, тус төвийг мөргөж, зорчигч 20 настай, эрэгтэй Б гэмтсэн байна. Мөн нэгдүгээр сарын 3-нд Баянзүрх дүүргийн II хороо Улиастайн замд “Lexus RX-270” маркийн автомашины жолооч М нь замын голын хашлага мөргөж, жолооч 37 настай, эмэгтэй М бэртжээ.

Харин цагдаагийн алба хаагчдаас хийсэн хяналт шалгалтын үеэр нийслэлд согтуугаар тээврийн хэрэгсэл жолоодсон 39, орон нутагт 31 жолоочийг илрүүлж, хуулийн дагуу хариуцлага тооцсон байна.