Тээврийн цагдаагийн албанд энэ сарын 12-15-ны өдөр нийт 1171 дуудлага мэдээлэл ирсний 914 нь зам тээврийн ослын шинжтэй байжээ. Эдгээр өдрүүдэд зам тээврийн ослын улмаас 25 насанд хүрэгч, дөрвөн хүүхэд гэмтсэн байна. Мөн ноцтой зам тээврийн ослын улмаас нийслэлд нэг, орон нутагт таван  хүн амиа алджээ.

Мөн хяналт шалгалтын үеэр согтуугаар тээврийн хэрэгсэл жолоодсон 122 жолоочийг илрүүлж, жолоодох эрхгүй буюу эрхээ хасуулсан үедээ согтуугаар тээврийн хэрэгсэл жолоодсон 21 жолоочийг шүүхээр баривчлуулж, хуулийн дагуу хариуцлага тооцсон байна. 

Уншигчдадаа сэрэмжлүүлэх зорилгоор цоцтой зам тээврийн ослоос дурдвал:

• Хэнтий аймгийн Баян-Адарга суманд энэ сарын 13-ны 15:20 цагийн орчимд “Lexus-470” маркийн автомашин онхолдож, зорчигч 48 настай, эрэгтэй Г амиа алджээ. 
• Мөн өдрийн 20:55 цагийн орчимд Ховд аймгийн Булган сумын төвөөс 15 км замд “Toyota corolla” маркийн автомашин онхолдож, зорчигч 48 настай, эрэгтэй Э, 31 настай, эрэгтэй Г нар амиа алдсан байна.
• Энэ сарын 13-ны 02:32 цагийн орчим БЗД-ийн XII хороо “Жанжин” захын хойд замд “Toyota aqua” маркийн автомашины жолооч Г нь  явган зорчигч 49 настай, эрэгтэй А-г мөргөж амийг нь хөнөөжээ.