Хариуцлага алдаж, халдвар дотоодод тархах нөхцөл бүрдүүлсэн “Энхсаран” сувилал хэнийх вэ, өнөөг хүртэл хариуцлагаас бултаж яваа “Энхсаран” сувилал улс төрийн том “артай” юу гэх асуулт олон нийтийн дунд таавар мэт явж байна. 

Тухайлбал, 

- “Энхсаран” сувиллыг Эрүүл мэндийн сайд асан Д.Сарангэрэлийн хамаарал бүхий этгээд эзэмшдэг гэх мэдээлэл 10 хоногийн өмнө тарсан. Тодруулбал Д.Сарангэрэл нь Эрүүл мэндийн сайдаар ажиллаж байхдаа “Энхсаран” сувилалд тусгаарлах байрны үйл ажиллагаа явуулах эрх өгсөн, хулгана, жоомны асуудлыг нь хаацайлж ирсэн гэх мэдээлэл гарч ирсэн юм. Харин Д.Сарангэрэл өөрөө “Надад хамааралгүй” гэж няцаагаад өнгөрсөн байдаг. 

 

- Хотын дарга Д.Сумъяабазарын туслах “Энхсаран” сувилалтай холбоотой гэх хардлага гарч ирсэн. Гэхдээ хэрхэн, ямар замаар “Энхсаран” сувилалтай холбогддог вэ гэдэг тодорхой үндэслэл гарч ирээгүй байгаа. 

 

- Хууль, зүй дотоод хэргийн сайд Х.Нямбаатарын дотны найз М.Жаргалсайханы хадам ээж нь “Энхсаран” сувиллын үүсгэн байгуулагч гэх мэдээлэл өчигдрөөс гарч эхэлсэн. Тодруулбал, Сэтгүүлч Б.Отгон ““Энхсаран” сувилалын захирал нь Н.Ганчимэг гэдэг эмч байдаг. Нөхөр нь Очирпүрэв. Тэд О.Түмэндэмбэрэл, О.Түмэнбаяр, О.Түмэн-Өлзий гэдэг гурван хүүхэдтэй. О.Түмэнбаяр нь “Энхсаран”ХХК-ийн захирал. Охин О.Түмэндэмбэрэл нь ХЗДХ-ийн сайд Х.Нямбаатарын ойрын найз, улс төрийн хамтрагч, СХД-ийн ИТХ-ын төлөөлөгч М.Жаргалсайханы эхнэр. Тэд гэр бүлээрээ сайд Х.Нямбаатартай олон жилийн турш хамтран ажиллаж байгаа. О.Түмэндэмбэрэл нь өөрийн “Аздентал”ХХК-ийн “Аз” шүдний эмнэлгээрээ Х.Нямбаатарын үүсгэн байгуулсан “Нямбаатар” сангаас зохион байгуулсан “Хүүхдийн инээмсэглэл” төслийг хэрэгжүүлсэн нь хэр ойрхон найзууд гэдгийг батална” гэж нийтэлсэн юм. Харин Х.Нямбаатар “СХД-т надтай хамт ажиллаж байсан бүх хүмүүсийн хадмуудтай холбох уу?” гэсэн хариултыг цахим хуудсаараа өгөөд байгаа. 

 

Энэ мэтээр Ерөнхий сайд У.Хүрэлсүхийн танхимын хоёр сайд, хотын дарга “Энхсаран” сувилалтай холбоотой гэж хардагдаж байна. Гэхдээ Засгийн Газар, Улсын онцгой комисс болон холбогдох албаныхан “Энхсаран” сувилалтай холбоотой мэдээллийг ихэд нууцалж байгаа юм. 

 

Түүнчлэн хуулийн этгээдийн улсын бүртгэлд “Энхсаран” ХХК нь Очирпүрэвийн Түмэнбаяр гэх иргэний нэр дээр бүртгэлтэй байдаг. Манай сайт “Энхсаран”сувиллын захирал О.Түмэнбаяртай холбогдож, тодруулга авахад “Би яг одоо цагдаа дээр байцаалт өгч байна. Иймд яг одоогийн байдлаар манай сувиллын зөв, буруугийн тухай ярих болоогүй” гэсэн байдаг. Гэвч “Энхсаран” сувилалд үүсгэсэн эрүүгийн хэрэг одоо ямар шатандаа яваа, ямар хариуцлага тооцох нь нууц хэвээр байна. 

 

Мөн Шадар сайд Я.Содбаатар “Бидэнд хүнд хариуцлага тооцох цаг хугацаа олдох байх. Энэ нөхцөл байдлуудын дараа том дүгнэлт гарч таарна. “Энхсаран” сувилал дээр халдвар, хамгааллын дэглэм алдсан. Тэнд хариуцаж байсан хүмүүсийн тоо, нэр ус байгаа. Гэхдээ өнөөдрийн нөхцөл байдалд, олон хүн өдөр, шөнөгүй 24 цагаар зүтгэж байгаа энэ үед тэдгээр хүмүүст хариуцлага тооцох уу, үгүй юу гэдгийг бодож байна” хэмээн бөөрөнхийлсөн байдаг. 

Уг нь “Энхсаран” сувилал Улсын онцгой комиссын өмнө хүлээсэн үүргийнхээ дагуу гадаадаас эх орондоо ирсэн иргэдийг 21 хоног тусгаарлаж, халдваргүй гэдэг нь эцсийн байдлаар батлагдах хүртэл халдвар хамгааллын хатуу дэглэм мөрдүүлэх ёстой байсан. Гэсэн ч “Энхсаран” сувилал нь наад захын эрүүл ахуйн шаардлага хангаагүй өрөө, тасалгаатай, хулгана, жоом, пясаа орны хөндийгөөр нь гүйдэг, дундын нэг дүштэй гэх хэл ам өнгөрсөн хугацаанд байнга гарч байсан. Энэ алдаа дутагдлаа яаралтай засаж, залруулах байтал харин ч эсэргээрээ тус сувиллынхан ч, тэнд хяналт тавих ёстой байсан цагдаа, тагнуулыхан ч хэт цалгар байснаас болоод тусгаарлалтад байсан иргэд нэгнийхээ өрөөгөөр дураараа сэлгүүцэж, хамт хооллож, бөөндөө хөзөрдөж, эцэст нь дотроосоо халдвар алдсан.

Тиймээс “Энхсаран” сувиллын ард хэн ч байдаг бай, улс төрд хэр нөлөөтэй бай үл хамааран хариуцлага тооцуулах нь зүйн хэрэг юм.