Сүхбаатарын талбай дээр өчигдөр 34 настай Э өөр дээрээ усны саванд хийсэн бензин асгаж, амиа алдсан харамсалтай хэрэг гарсан.

Тэрбээр төв талбайн баруун талаас савтай бензин барьж ирэн, өөр дээрээ асгасныхаа дараа 20 алхаад өөрийгөө галдсан дүрс бичлэг олон нийтэд ил болсон билээ. Тухайн үед хамгаалалтад гарч байсан цагдаагийн алба хаагч болон ойролцоо явж байсан хоёр иргэн түргэн шуурхай арга хэмжээ авсан хэдий ч амийг нь амарч чадаагүй юм. Улмаар хэргийн газарт цагдаа, тагнуул, шүүхийн шинжилгээний хамтарсан баг ажиллаж, хэргийг шалгаж байна. 

Хэргийн газарт шалгалт хийх явцад талийгаачийн биенээс бичиг баримт бүхий цаас олдсоныг албаныхан газар дээр нь шалгаж байгаа зураг мөн цахим сүлжээнд маргаан дагуулж байгаа. Түүнийг гэрээслэл бичиж үлдээсэн байж болзошгүй гэх таамгууд ч гарсан. Харин эх сурвалжийн мэдээлж буйгаар албанынхны шалгаж буй энэ цаас нь талийгаачийн иргэний үнэмлэхний хуулбар нь байжээ.

Талийгаач Э Чингэлтэй дүүрэгт аав, дүүгийн хамт амьдарч байсан талаар бид өмнө нь мэдээлсэн.