Цэргийн албанд татагдсан залуусыг тээвэрлэж явсан автомашины жолооч зам тээврийн осол гаргажээ. Тодруулбал, өнөөдөр буюу аравдугаар сарын 17-ны өглөө Хэнтий аймгийн төвөөс Дорнод аймгийн Матад суманд байрлах хилийн 0306 дугаар анги руу хөдөлсөн автомашин замын хажуу руу унаж, зорчигчид гэмтжээ.

           Энэ талаар Хил хамгаалах ерөнхий газрын Олон нийттэй харилцах төвийн мэргэжилтнээс тодруулахад “Цэргийн албанд татагдсан залуусыг ангид нь хүргэж өгөхөөр явж байсан машин осолдсон нь үнэн. Машин өнхрөөгүй, замын хажуу руу унасан гэсэн. Автомашинд цэргийн албанд татагдсан 17 залуу зорчиж явсан юм билээ. Үүнээс зургаа нь бэртэл авсан байж болзошгүй учир Хэнтий аймгийн нэгдсэн эмнэлэгт нарийн шинжилгээнд хамруулсан. Шинжилгээний хариу гарсан бөгөөд ноцтой гэмтэл, бэртэл авсан хүн байхгүй. Хөл, гар нь хугарч, ясны гэмтэл авсан хүн байхгүй. Цэргийн албанд татагдсан залуусын ар гэрийнхэнд мэдэгдсэнээс заримынх нь аав, ээж Хэнтий аймагт очсон байгаа" гэлээ.