ГЕГ-аас 2022 оны эхний долоон сарын гадаад худалдааны гүйцэтгэлийг танилцуулав.

Оны эхний долоон сард экспортод 6.4 тэрбум ам.долларын бараа, түүхий эд нийлүүлсэн нь өнгөрсөн 2021 оны мөн үетэй харьцуулахад 36.3 хувиар өссөн үзүүлэлт болжээ. Үүний 99.4 хувийг валютын төлбөртэй худалдаа эзэлж байгаа юм.

Өнгөрсөн долоон сарын хугацаанд Монгол Улсаас дэлхийн 59 оронд бараа экспортолсноос БНХАУ-д хамгийн их хувь буюу 84.2 хувьтай тэнцэх бараа нийлүүлжээ. Харин Швейцарт 7.6 хувь, Сингапурт 4.3 хувь ногдох бөгөөд нийт экспортын 96.1 хувийг дээрх орнууд эзэлж байна.

                            2022 оны эхний долоон сард экспортолсон хар тугалганы хүдэр болон баяжмал, төмрийн хүдэр, зэсийн баяжмал болон цайрын баяжмалыг 100 хувь, чулуун нүүрсний 88.8 хувийг БНХАУ-д, үхэр адууны боловсруулсан ширний 77.6 хувь, самнасан ноолуурын 86 хувийг Италид, ямааны угаасан ноолуурыг 100 хувь БНХАУ-д тус тус экспортолсон. Харин гадаад руу нийлүүлсэн нийт эрдэс бүтээгдэхүүний 5.5 тэрбум ам.доллар буюу 85.5 хувь, сувд, үнэт бөгөөд хагас үнэт чулуу, үнэт металл, гоёлын зүйлс, зоос 517.9 сая ам.доллар буюу найм хувь, нэхмэлийн материал болон нэхмэл эдлэл 312.3 сая ам. доллар буюу 4.8  хувийг тус тус эзэлсэн нь нийт экспортын дүнгийн 98.4 хувийг эзэлжээ.