Үндсэн хуулийн цэцийн дунд суудлын хуралдаанаар Ерөнхийлөгч Х.Баттулгыг 2021 оны Ерөнхийлөгчийн сонгуульд нэр дэвших эрхгүй гэх шийдвэр гаргалаа.

Энэ шийдвэрийн талаар Үндсэн хуулийн цэцэд мэдээлэл гаргагч, хуульч Д. Үүрцайх “Үндсэн хуулийн цэцээс Монгол Улсын Ерөнхийлөгчийн тухай хуулийн гуравдугаар зүйлийн 3.1.2 дахь хэсэг, тавдугаар зүйлийн 5.4 дэх хэсэгт  Монгол Улсын Ерөнхийлөгчийн сонгуульд нэр дэвшигчдэд тавигдах шаардлагуудыг бүрэн тусгаагүйгээс хууль хэрэглээний эрхзүйн тодорхойгүй байдал үүссэн. Эдгээр хэм хэмжээ нь Монгол Улсын Үндсэн хуулийн нэгдүгээр зүйлийн хоёр дахь хэсэг буюу төрийн үйл ажиллагааны зарчим 30 дугаар зүйлийн хоёр дахь хэсэг буюу Монгол Улсын иргэн Ерөнхийлөгчөөр 50 нас хүрсэн, эх орондоо таваас доошгүй жил оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно гэх хууль зөрчсөн. Мөн 70 дугаар зүйлийн нэг дэх хэсэг буюу төрийн байгууллагын үйл ажиллагаа үндсэн хуульд бүрэн нийцсэн байх заалтыг зөрчсөн байна.

Ерөнхийлөгчийн сонгуулийн тухай хуулийн дээрх хоёр заалтыг түтгэлзүүлэх шийдвэрийг 24 цагийн дотор албажуулж УИХ болон бусад байгууллагуудад хүргүүлэх ёстой. УИХ 15 хоногийн дотор Үндсэн хуулийн цэцийн дунд суудлын хуралдааны шийдвэрийг хүлээн авах эсэхээ шийдвэрлэнэ. Энэхүү шийдвэр эрх мэдэл, албан тушаал, дарга ялгаагүй ардчилал эрх чөлөөний төлөөх шийдвэр болсон. Бид дарангуйлагчтай болох замын эрмэг дээр байсан. Энэ аюулаас Монгол Улс мултарч чадлаа гэж үзэж байна” гэлээ.