“Улс төр, эдийн засаг, эрхзүйн шийдэл, нийгмийн зөвшилцөл” чуулга уулзалт Төрийн ордонд болж байна. Тус чуулганд Монгол Улсын гуравдах Ерөнхийлөгч асан Н.Энхбаяр өөрийн байр суурийг илэрхийллээ.

Тэрбээр “Монгол Улсын нийгэм, эдийн засгийн байдал өнөөдөр үнэхээр хямарсан байна. Энэ хүнтэй, тогтолцоотой холбоотой гэдэг нь ойлгомжтой. Би тогтолцоо талаас нь ярина. Өнөөдөр хоёр парламентын тухай ярьж байна. Нөгөө хүний эрх, байгалийн баялгийг ард түмэнд өгөх асуудал, шударга, хараат бус шүүх, орон нутгийн өөрөө удирдах ёс, хэвлэл мэдээллийн эрх чөлөө, жагсах, эвлэлдэн нэгдэх эрх чөлөө хаачсан вэ. Зөвхөн хоёр танхимтай парламентаар хязгаарлаад, залуусыг албан тушаал руу тэмүүлэх өдөөлтийг хийгээд байна. Хоёр танхимтай парламент маш зөв. Гэхдээ үүний цаана та бүхэн хулгай гараад байгаа байгалийн баялгаа ард түмэнд өгөх асуудлаа битгий мартаач ээ. Яагаад залуучуудыг дээд сургуульд үнэгүй сургаж болохгүй гэж. Өнөөдөр 240-хөн мянган залуучуудаа  өөрсдөө мөнгөө төл гэдэг. Тэднээс нь жилд дор хаяж 50 мянга нь сургууль завсардаж, мэргэжилгүй, ямар ч ирээдүйгүй, гэр бүлгүй, архи тамхинд орж байна. Үндсэн хуульд зөвхөн ЕБС үнэ төлбөргүй, дээд боловсролын төлбөрийг өөрөө төл гэж бичсэн байдаг. Аливаа ойлгомжгүй байдал хүн дураараа дургихын үндэс суурь болдог. Ойлгомжгүй байдал хулгайг бий болгоод байна" гэлээ.